Йæ байгом кæныны кадджын мадзалы архайдта республикæйы разамынд
Æрæфы районы ныр ис иттæг хорз уавæртæ физкультурæ æмæ спортæй архайынæн. Цыколайы арæзт æрцыди нырыккон спортивон-дзæбæхгæнæн комплекс. Йæ байгом кæныны кадджын мадзалы архайдта республикæйы разамынд. Республикон программæ «Хъæуты территориты комплексон рæзт»-ы фæлгæты объект сырæзт дыууæ азмæ. 5 мин квадратон метрыл фæзынд спорты алы хуызтæй архайынæн залтæ æмæ спортивон фæзтæ. Бæлвырддæр радзурдзæн Сосранты Жаннæ.
Æрæфы районы спортивон –дзæбæхгæнæн комплексы байгомыл цин кæнынц куыд суинаг спортсментæ, афтæ спорты сгуыхтдзиндæтæ чи равдыста ахæмтæ дæр. Сæ иу уæгъдибар хъæбысæйхæстæй Уæрæсейы чемпион Хъызымты Зауыр. Раздæр тренировкæтæ кодта Цыколайы сывæллæтты спортивон скъолайы. Ног комплексы цы уавæртæ ис, уыдонмæ бæлгæ дæр кодта. Зын бауырнæн уыд, хъæуы ахæм хъуыддаг царды йæ бынат ссардзæн, ууыл.
Уæвгæ ацы ногдзинады фæрцы фæуæрæхдæр уыдзысты тренерты авналæнтæ. Æппæтадæмон къласы спорты мастер Дзадазайты Мирон бирæ райдзаст спортивон бынæттæ федта, фæлæ йæ райгуырæн хъæуы цы бæстыхай сыразыд, уый та æгæрон у дæрддзæф районы фæсивæды хъомыладыл кусынæн. Уымæ гæсгæ йæ цинæн кæрон нæй. Уый та ууыл дзурæг у æмæ Æрæфы районы спортивон традицитыл кæй бафтдзæн.
Спортивон-дзæбæхгæнæн комплекс байгом кæнын кадджын мадзалы бацархайдтой республикæйы сæргълæууæг Сергей Меняйло æмæ Тускъаты Таймураз. Уыдон æркастысты æппæт залтæм дæр, аргъ скодтой уавæртæн.
Парламенты сæрдар Тускъаты Таймураз та, канд кæсгæ нæ кодта, сарæзт хъуыддæгтæм, фæлæ ма йæ бафæндыд сæ бафæлварын. Уыимæ бавдыста кæстæр фæлтæрæн – куыд ахсджиаг у алы кары дæр æнæниз царды уагыл кусын.
Æрæфы районы спортивон – дзæбæхгæнæн комплексы арæзтад райдыдта 2021 азы, паддзахадон программæ “Хъæуты территориты комплексон райрæзт»-мæ гæсгæ. Ам кусдзæн 8 секцийы. Архайыны фадат дзы уыдзæн дыууæ мин сывæллонæн.
Бæстыхай конд æрцыд Æрыдоны спортивон – дзæбæхгæнæн комплексы проектмæ гæсгæ. Æппæт секцитæ дæр дзы хъуамæ æркусой мæймæ.
