Фыццаг скъолайы бындурыл архайджытæн бацæттæ кодтой квесттæ, равдыст, конструкторон æрмадзтæ æмæ бæрæгбоны концерт
Æрæфы районы скъоладзаутæн фæцис, сæхи инженерты, космикон тæхæн аппаратты конструкторты æмæ иртасджыты хуызы бафæлварыны фадат. Цыколайы уыд, адæймаг космосмæ фыццаг хатт куы атахт, уый 65 азы кадæн фестиваль. Фыццаг скъолайы бындурыл архайджытæн бацæттæ кодтой квесттæ, равдыст, конструкторон æрмадзтæ æмæ бæрæгбоны концерт. Мадзал бабæрæг кодтой Кæсæг-Балхъарæй уазджытæ. Бæлвырддæр радзурдзæн Хъайтмазты Дзерассæ.
9-æмкъласон Самир Абдуллаев ахуыр кæны Лескены скъолайы. 2 азæй фылдæр архайы робототехникæйæ. Космикон фестивальмæ скъоладзау æрбаласта цалдæр куысты: роботтæ – æмбырд сæ кодта йе мкъласонтимæ æмæ æндæр ахуырдзаутимæ. Самиры ныхæстæм гæсгæ, робототехникæ йын æрмæст цымыдисаг нæу, фæлæ ма йын дæтты, техникон хъуыдыкæнынады райрæзтыл архайыны гæнæн. Йæ модельты хсæн ис алыхуызон зондджын машинæтæ.
Цыколайы 1-æм скъолайы бындурыл фестиваль баиу кодта цалдæр тематикон фæзы. Ам байгом кодтой конструкторон æрмадзтæ. Сывæллæттæ сæхи къухтæй æмбырд кодтой чысыл æрвон наутæ, архайдтой космикон квестты, зонгæ кодтой космосы темæимæ баст равдыстимæ. Рæзгæ фæлтæр райстой ног зонындзинæдтæ æмæ сæхи бафæлвæрдтой инженертæй æмæ иртасджытæй.
Мадзалы архайдтой Æрæфы районы скъоладзаутæ æмæ ахуыргæнджытæ, стæй республикæйы иннæ районтæй æмæ Кæсæг-Балхъарæй уазджытæ. Цы фæзтæ сын бацæттæ кодтой, уыдоны алчидæр ссардта йæхицæн цымыдисаг хъуыддаг. Рæзгæ фæлтæр базонгæ сты космикон наукæты æмæ технологиты бындуртимæ.
Актон залы та арæзт æрцыд концерт. Скъоладзаутæ равдыстой тематикон хореографион æмæ вокалон номертæ. Архайджытæн ма бацæттæ кодтой адджинæгтимæ фынг. Космикон фестиваль сси ирд цау сывæллæтты царды. Скъоладзауты сразæнгард кæндзæн техникон наукæты бæрзæндтæм фыццаг къахдзæфтæ кæнынмæ.
