Баст у йæ райгуырды 90 азы бонимæ
Тугъанты Махарбеджы номыл аивадон музейы байгом Цæгат Ирыстоны сгуыхт нывгæнæг Хетæгкаты Хъазыбеджы куыстыты равдыст «Адæмон зарæггæнæг». Баст у йæ райгуырды 90 азы бонимæ. Экспозицийы равæрдтой аивадон музейы æмбырд нывтæ, стæй раздæр кæй нæ федтой, ахæм графикон сыфтæ нывгæнæджы бинонты коллекцийæ. Мастер Цæгат Кавказы æмæ Уæрæсейы нырыккон аивадмæ бахаста стыр æвæрæн. Бæлвырддæр радзурдзæн Хъайтмазты Дзерассæ.
Хетæгкаты Хъазыбеджы хонынц «изæрыгон» колориты мастер. Йе нгом охрæтæ æмæ уæззау умбрæтæ хуымæтæг фон æмæ пигменттæ не сты, фæлæ ма миддунейы рухсы гуырæн. Экспозицимæ хаст æрцыд 100 куысты онг. Равдыст саразджытæ куыд зæгъынц, афтæмæй нывгæнæджы царды æппæт рæстæджытыл аххæссын æнцон нæ уыд. Экспозици цæттæ кодтой цалдæр мæйы, æмæ дзы цы хатдзæг рауад, уымæй зæрдæ райы.
Сæдæ нывы онг æмæ графикæ ссардтой сæ бынат Тугъанты Махарбеджы номыл аивадон музейы залты, уымæн бахъуыд лæмбынæг куыст. Уацмысты фылдæр хай сты нывгæнæджы фæдонты хи архивтæй. Хетæгкаты Хъазыбеджы фырт Аслан куыд зæгъы, афтæмæй æнæ музейы æххуысæй ахæм стыр проект царды рауадзын нæ бантыстаид. Фæлæ йын сæйрагдæр у, цæмæй йын аивадуарзджытæ йæ фыды феной, хиуæттæ йæ цавæр адæймагæй зыдтой, ахæмæй.
Ацы проект аивадуарзджыты раз гом кæны, æрмæст ахуырадон чингуытæм гæсгæ зонгæ куыстытæ нæ, фæлæ ма сусæггонд цы вæййы, уый дæр. Равдысты уазджытæн сæ бон у бандзæвын мастеры сфæлдыстадон лабораторимæ. Нывтæ, нывгондтæ, хъуыдытæ, интерактивон планшетты фæрцы фенæн ис, авторы блокноттæй эскизтæ. Экспозици байгом кæныны кадджын мадзалы уыдысты ирон нывкæнынадæн аргъ чи кæны, уыдон. Се хсæн, нывгæнæджы комкоммæ чи зыдта, ахæм адæм дæр. Ацы изæр бирæ фæлмæн ныхæстæ æмæ мысинæгтæ азæлыд музейы.
Хетæгкаты Хъазыбег Цæгат Кавказы æмæ Уæрæсейы нырыккон аивадмæ бахаста стыр æвæрæн. Уый тыххæй йын лæвæрд æрцыдысты Советон Цæдисы аивæдты Академийы æвзист майдан æмæ Цæгат Ирыстоны сгуыхт нывгæнæджы кадджын ном. Уыимæ Хетæгкаты Хъазыбег нæ республикæйы айхъуыст куыд курдиатджын адæмон æмæ хъæбатырты зарæггæнæг. Йæ куыстытæ та фенæн ис канд Тугъанты Махарбеджы номыл аивадон музейы фондты нæ, фæлæ ма зындгонд Уырыссаг музейы, скæсæйнаг адæмты музейы, Уæрæсейы алы горæтты хи коллекциты, Мæскуыйы æмæ Санкт-Петербурджы.
