Программæ «Хæхтæ хъахъхъæнæг æмæ хъæдты хицау: кавказаг фыранк æмæ хъæддаг гал» æххæстгæнгæйæ балхæдтой 35 ног æмбæхст къамисæны
Турмоны фæдзæхст бынаты пайда кæнынц, цы цæрæгойтæ дзы ис, уыдоны къамтæ æмæ видеоæрмæджытæ исынæн нырыккон техникон фæрæзтæй. Программæ «Хæхтæ хъахъхъæнæг æмæ хъæдты хицау: кавказаг фыранк æмæ хъæддаг гал» æххæстгæнгæйæ балхæдтой 35 ног æмбæхст къамисæны. Уыдонæй раст кусыны æмæ сын хуыздæр бынæттæ равзарыны тыххæй арæзт цæуынц практикон ахуыртæ. Семинар федта не сфæлдыстадон къорд. Бæстондæр хабæрттæ радзурдзæн Чехойты Фатимæ.
Бынатæн бæстон æркаст саразын – къамисæн бамбæхсынæн, æнæмæнг, хъæугæ куыст. Кæд фæлтæрдджын инспектортæн Турмоны хъæдты æнæзонгæ къуымтæ нæй, уæддæр. Цæрæгойты къахвæндæгтæ сын рагæй сты бæлвырдгонд. Хъæуы къам æмæ видео исæн фæрæзтæй раст пайда кæнын базонын. Хъæрджынты Дзамболат фæдзæхст бынаты кусы 15 азы. Уый хуызæн ацы бынæттæ æмæ цæрæгойты хуызтæ ничи зоны. 12 æмæ *рдæг мин гектарыл фенæн ис æрсытæ, сагтæ, æрæджы дзы фæзындысты Сырх чиныгмæ хаст фыранктæ æмæ домбайтæ. Специалисты ныхæстæм гæсгæ, цæрæгойты хыгъд саразынæн æмæ сын сæ хицæндзинæдтæ бæрæг кæнынæн æрмæст техникон фæрæзтæ фаг не сты.
Практикон фæлтæрдтæ фæлхат кæнын – ахуырады дыккаг къæпхæн. Цæрæгойтæ хъахъхъæныны куыстуат «Беркут»-ы инспектортæн раздæр сарæзтой лекцитæ къамисæнты тыххæй. Базонгæ сæ кодтой техникон фæрæзты куысты хицæндзинæдтимæ, кæм æмæ сæ куыд бафидар кæнын хъæуы,бамбарын сын кодтой æппæты ахсджиагдæр хъуыддаг – сæ нысаниуæг. «Фæдзæхстон Ирыстон-Аланийы» зонадон кусæг Павел Вейнбергы практикон фæлтæрддзинадыл ахуыр кæнынц инспектортæ. 2013-æм азæй фæстæмæ æвæры æмбæхст къамисæнтæ. Йæ ныхæстæм гæсгæ, техникон фæрæзты хицæндзинæдтæ базонын цыбыр рæстæгмæ нæ бантыст. Семæ архайгæйæ сын раиртæста сæ сусæгдзинæдтæ. 6 мæйæ афæдзы онг – сæ куысты рæстæг. Ахсджиаг у, раст бынæттæ сбæрæг кæнын.
Республикæйы фæдзæхст бынæтты æмбæхст къам æмæ видеоисæн фæрæзтæй зоологтæ активонæй пайда кæнынц. Уыцы ифтонггæрзты руаджы сæм цы æрмæджытæ фæзыны, уыдонæн ис стыр аргъ, зæгъынц специалисттæ.
Нырыккон къам æмæ видео исæн æмбæхст фæрæзтæй фæдзæхст бынаты пайда кæнынц проект «Хæхтæ хъахъхъæнæг æмæ хъæдты хицау: кавказаг фыранк æмæ домбай» æххæстгæнгæйæ. 35 техникон иуæджы балхæдтой æрдзы президентон фонды руаджы.
Регионалон нысаниуæг кæмæн ис, ахæм фæдзæхст бынæттæ республикæйы сты 3: Турмоны, Змейкæ æмæ Николаевскæйы *хсæн, стæй Заманхъулы. Се *ппæтæн дæр ис зоологон нысаниуæг. Уыцы бынæтты къам æмæ видео исæн æмбæхст техникон фæрæзтæ сты хорз фадат специалисттæн цæрæгойты тыххæй фылдæр æрмæджытæ сæмбырд кæнынæн.
