Нысангонд дзы цыд районы социалон-экономикон райрæзт 2020-æм азы, стæй ацы аз цы куыст цæудзæн, уый
Республикæйы хицауады сæрдар видеобастдзинады фæрцы байхъуыста Æрыдоны районы администрацийы сæрдар Зауырбег Магомедовы докладмæ. Нысангонд дзы цыд районы социалон-экономикон райрæзт 2020-æм азы, стæй ацы аз цы куыст цæудзæн, уый. Æрыдоны районы ис 538 чысыл æмæ астуккаг куыстуаты. Ивгъуыд аз бюджет æххæстгонд æрцыд 100%. Хъалонты æмæ æндæр æфтиæгтæ сты 166 милуан сомы. Æххæст дзы кæнынц паддзахадон æмæ национ программæтæ. Сæ фæлгæты сцалцæг кодтой æмæ сарæзтой социалон ахсджиаг объекттæ – медицинæ, ахуырад æмæ культурæйы къабазы. Докладгæнæг радзырдта ацы азы нысанты тыххæй дæр. Сæ иу Нарт – Фыййагдон – Рассветы фæндагыл цæугæдоны сæрты хиды арæзтад. Рассвет æмæ Мичурины хъæуты та бындуронæй сцалцæг кæндзысты культурæйы хæдзæрттæ. Хицауады сæрдар байхъуыста Æрыдоны районы ахуырады, спорты æмæ культурæйы къабæзтæ цы уавæры сты, уымæ. Тускъаты Таймураз раарфæ кодта Æрыдоны районы разамындæн æмæ сын йæ зæрдæ загъта дарддæры æнтыстдзинæдтæ.
