Раарфæ йын кодта йæ бирæ азты æнæзæрдæхудт фæллойы тыххæй
Цæгат Ирыстоны Парламенты сæрдар Тускъаты Таймураз нæ республикæйы культурæйы сгуыхт кусæг, актер, режиссер æмæ журналист Баскаты Уырызмæгæн Парламенты номæй радта кады гæххæт. Раарфæ йын кодта йæ бирæ азты æнæзæрдæхудт фæллойы тыххæй. Куыд загъта, афтæмæй хистæр кары адæм хорз хъуыды кæнынц Уырызмæджы ирд рольтæ театры æмæ кинойы. «Ирыстоны культурæмæ цы стыр æвæрæн бахастай, уый у дæнцæгæн хæссинаг æмæ цæстыгагуыйау хъахъхъæнинаг. Дæ курдиат æнцой кæны царды ахсджиагдæр миниуджытыл. Уыдон та сты: уарзондзинад, хæлардзинад æмæ кæрæдзи æмбарынад. Кæй зæгъын æй хъæуы, де сфæлдыстадон фæндаджы сæйрагдæр хай баст у спортивон журналистикæимæ. Чи зоны, æмæ бирæтæ спортмæ се ргом раздæхтой дæ репортажты æмæ программæты фæстæ: «Осетия спортивная», «Восточная трибуна», «На ковер приглашаются», «Звезды осетинского спорта» æмæ иннæтæ. Уыдонмæ кæсгæйæ, дæсгай, сæдæгай лæппутæ æмæ чызджытæ слæууыдысты царды раст фæндагыл. Æмæ дын уый тыххæй зæгъæм æгæрон бузныг», – загъта Парламенты сæрдар. Баскаты Уырызмæгæн йæ карьерæ райдыдта театры. Уый фæстæ йæхи фæлвæрдта кинойы æмæ режиссурæйы. Фæлæ йæ царды фылдæр хай баст у паддзахадон телерадиокомпани «Алани»-имæ. Ам фæкуыста 40 азы. Бирæтæ уæлдай цымыдисæй æнхъæлмæ кастысты йæ репортажтæм европæйаг æмæ дунеон турниртæй. Уырызмæгæн саккаг кодтой бирæ хæрзиуджытæ.
