Хицауады сæрдар уæлдай æргом аздæхта, фæсивæдон политикæйы къабазы цы мадзæлттæ æххæст кæнынц, уыдонмæ
Хицауады сæрдар Тускъаты Таймураз видеобастдзинады фæрцы кусæг фембæлд сарæзта, республикæйы фæсивæды комитеты сæрдар Джусойты Руслан æмæ тарифты регионалон службæйы разамонæг Куымæриттаты Аланимæ. Тускъаты Таймураз уæлдай æргом аздæхта, фæсивæдон политикæйы къабазы цы мадзæлттæ æххæст кæнынц, уыдонмæ. Ацы аз уыцы нысантæн радих кæндзысты фæндзай милуан сомы. Программæйы ис 5 къабазы — фæсивæдон амалхъомдзинад, бархионты змæлд, наукон-техникон архайд, патриотон хъомылад æмæ æппæрцæг фæзындты профилактикæ фæсивæды хсæн. Фарон нæ республикæйы 700 минæвары архайдтой алыхуызон конкурсты æмæ сæ бæрæггæнæнтæм гæсгæ Цæгат Ирстонмæ æрбаздæхтой 60 милуан сомы. Джусойты Руслан куыд загъта, афтæмæй стыр æргом здæхт цæуы бархионты змæлдмæ æмæ ацы аз дæр уыцы къабазы куыст ахæццæ кæндзысты дарддæр. Куымæриттаты Алан хицауады сæрдарæн радзырдта ивгъуыд азы тарифон кампанийы бæрæггæнæнты тыххæй. Йæ ныхæстæм гæсгæ, службæ æдзухдæр цæст дардта, инвестицион программæтæ куыд æххæстгонд цæуынц, уымæ. Фарон службæ равзæрста цæрджыты 70 курдиаты. Уыдонæн сæ фылдæр баст уыдысты цæрæнуæтæ-коммуналон лæггæдтæн фиддонтимæ. Ацы азæн нысантæм байхъусгæйæ Тускъаты Таймураз бафиппайдта, кæй хъæуы архайын, цæмæй тарифтæ республикæйы цæрджытæн æнцонфидæн уой, ууыл.
