Видеобастдзинады фæрцы дзырдтой зымæгон фæндæгты æдасдзинад фæхуыздæр кæныны æмæ национ проектты къабазы информацион куысты тыххæй
Тускъаты Таймураз кусæг фембæлд сарæзта фæндаггон хæдзарады комитеты сæрдар Солиты Тариель æмæ дзыллон коммуникациты комитеты сæрдар Фидараты Юрийымæ. Видеобастдзинады фæрцы дзырдтой зымæгон фæндæгты æдасдзинад фæхуыздæр кæныны æмæ национ проектты къабазы информацион куысты тыххæй. Хицауады сæрдар куыд загъта, афтæмæй боныхъæд кæй хæлы, уый тыххæй уæлдай ахсджиаг у фæндаггон змæлды æдасдзинадмæ бæстон цæстдард. Профилон комитеты сæрдар Солиты Тариель куыд радзырдта, афтæмæй фæндæгты уавæрмæ зымæгон цæст дарынц фараст подрядон куыстуаты. Комитет бакуыста скъолатæм æмæ æндæр социалон куыстуæттæм цы фистæгæйцæуæн фæндæгтæ ис, уыдоны уавæрыл. Æрмæст ацы аз базылдысты дыууын æртæ ахæм объектмæ. Ныртæккæ нæ республикæйы территорийыл цы фæндæгтæ ис, уыдоныл кусынц фæндзай аст видеоцæстдарды фæрæзы. Фидараты Юрий фехъусын кодта, комитеты Аланийыл саргъауыны мин сæдæ азы кадæн цы мадзæлттæ аразынц, уыдоны тыххæй. Ныртæккæ цæттæ кæнынц чингуыты сери «Алайнаг библиотекæ». Ацы аз дзы дунейы рухс фендзысты авд чиныджы. Уыимæ ныммыхуыр кодтой журнал «Чырыстон цард», мыхуырмæ æнрхъæлмæ кæсынц «История Алании» «Исторический атлас Осетии-Алании» æмæ ма ноджыдæр фондз чиныджы. Уыдон тæрхæджытыл фæзындзысты афæдзы кæронмæ.
