Афтæмæй федта, социалон нысаниуæг кæмæн ис, уыцы арæзтадон объектты уавæр
Æрвылкъуырион традицимæ гæсгæ, Цæгат Ирыстоны Хицауады сæрдары хæстæ æххæстгæнæг Тускъаты Таймураз инспекцион балц скодта республикæйы районтæм. Афтæмæй федта, социалон нысаниуæг кæмæн ис, уыцы арæзтадон объектты уавæр. Се хсæн ис – ацы мæйы райдиан эксплуатацийы раттынмæ кæй хъавыдысты, фæлæ фæтк чи нæ сæххæст кодта, ахæм объекттæ. Премьеры кусæг балцы хатдзæгты тыххæй бæстондæр радзурдзæн Сосранты Жаннæ.
Цыколайы спортивон комплексы райрæзтадмæ бавналдтой уалдзæджы. Объект у 5000 квадратон метры. Ныртæккæ уал куыст фесты йæ бындурыл. Комплекс конд цæуы хъæууон территориты райрæзты программæмæ гæсгæ. Проект царды уагъд цæудзæн дыууæ къæпхæнæй. Уыдзæн дзы спорты алыхуызтæй архайыны секцитæ. Тускъаты Таймураз аргъ скодта, æхсæнадон территоритыл куыд архайд цæуы, уымæн дæр. Куыстытæ дзы райдыдтой фарон. Æвæрд дзы æрцыд бадæн бынæттæ, къахвæндæгтæ, сывæллæтты æмæ спортивон фæзтæ. Ныртæккæ дзы архайд цæуы мадзæлттæ аразæн фæзыл. Дыууæ гектары территорийыл куыст хъуамæ фæуой октябры астæумæ. Проекты иумæйаг аргъ у 21 милуан сомы. Премьер федта Æрæфы районы рынчындоны поликлиникæйы капиталон цалцæгыл куыд куыст цæуы, уый.
Кæронмæ æрхæццæ Цыколайы æртыккаг скъолайы спортивон залы цалцæг. Ам куыстытæ сæрмагонд пъланæй фæфæстиат сты.
Дыгуры аивæдты скъолайы дæр куыстытæ иу гыццыл фæфæстиат сты. Йæ хъомылгæнинæгтæ хъуамæ ног ахуыры азы райдыдтаиккой ардæм цæуын, фалæ ма дзы ныр дæр цæуынц цалцæггæнæн куыстытæ.
Хицауады сæрдары хæстæ æххæстгæнæг уыд Хъарман-Сындзыхъæуы. Ам арæзт цæуы 120 бынаты кæм уыдзæн, æхæм рæвдауæндон. Тускъаты Таймуразы хæслæвæрдмæ гæсгæ дзы фæфылдæр кодтой кусджыты нымæц. Уый фæрцы фæткмæ гæсгæ цæуынц куыстытæ. Рæхджы та ма бавналдзысты йын йæ территори саив кæнынмæ. Ныртæккæ фарстайаг сты коммуналон хызтыл куыстытæ.
Йæ радон æркасты рæстæг ма Тускъаты Таймураз бабæрæг кодта Æрыдоны Цæгат –Кавказы аграрон –техникон колледж. Премьерæн равдыстой фæзтæ, кæцытæ сцалцæг кодтой грантты фæрцы. Ахуыргæнæндоны барæвдз кодтой хæринаггæнджытæн кусæн бынат, армдæснытæ скодтой æндадзджытæн, дзабыртæаразджытæн æмæ хъæдыкуыстгæнджытæн. Балхæдтой сын ног кусæндзаумæттæ. Тускъайы фырт куыд фæбæрæг кодта, афтæмæй проект «молодые профессионалы» бар дæдты республикæйы дæсны кадртæ фылдæр кæнынæн, ныхас цæуы кусæг дæсныйæдтыл. Се хсæн арæзтады къабаз.
Ацы æрзылды рæстæг фæстаг арæзтадон фæз Тускъаты Таймураз бабæрæг кодта изæрыгон. Къостайыхъæуы аразынц амбулатори. Куыд ыл архайд цæуы, уый йæ зæрдæмæ фæцыд. Уый размæ ацы объекттыл куыст дæр зæрдæхсаинаг уыд. Уæвгæ, премьер куыд загъта, афтæмæй иууылдæр куыстыты аипдзинад раиртасгæйæ йын йæ аххосаг базонгæйæ, æмбæлы дарддæры куыст фæхуыздæр кæнын.
