Фыццаг объект уыд Цæгат Кавказы хæххон æмæ хъæууон хæдзарады наукон-иртасæн институты фæлварæнтæ аразæн æмæ эксперименталон уаццаг
Республикæйы парламенты сæрдар Тускъаты Таймураз кусæг балцы рæстæг бабæрæг кодта Уæрæсейы наукæты академийы Дзæуджыхъæуккаг наукон центр. Фыццаг объект уыд Цæгат Кавказы хæххон æмæ хъæууон хæдзарады наукон-иртасæн институты фæлварæнтæ аразæн æмæ эксперименталон уаццаг. Ам æрзайын кæнынц халсарты культурæты 60 мыггаджы. Селекцион фæлварæнты фæрцы сын бантысы хуыздæр мыггаг раиртасын, сæрмагондæй чысыл хæдзарадон куыстуæттæн. Уымæй дарддæр Тускъаты Таймураз бабæрæг кодта хъæууонхæдзарадон зайæгойты молекулярон-генетикон иртæстыты лаборатори. Уым кæнынц алыхуызон иртæстытæ, цæмæй æрзайын кæной картофы, зымæгон культурæты æмæ нартхоры ног хуызтæ. Кусæг балцы рæстæг ма арæзт æрцыд æмбырд, æмæ дзы æрныхас кодтой Цæгат Ирыстоны хъæууонхæдзарадон куыстуæтты рæзтыл, стæй сын паддзахад цавæр æххуыс кæндзæн, ууыл.