Федта, культурæйы æмæ ахуырады къабазы социалон æгъдауæй ахсджиаг объектты арæзтад æмæ цалцæг куыд цæуы, уый
Тускъаты Таймураз кусæг балцы уыд Мæздæджы районы. Федта, культурæйы æмæ ахуырады къабазы социалон æгъдауæй ахсджиаг объектты арæзтад æмæ цалцæг куыд цæуы, уый. Зæгъæм, Черноярскæйы станицæйы скъола аразын райдыдтой ацы аз. Зæронд бæстыхайыл цæуы 110 азы, æмæ Цæгат Кавказы нымад у рагондæр бæстыхæйттæй иуыл. Коллектив архайдта скъола æмбæлгæ уавæрты дарыныл. 2022-æм азы ног скъола йæ дуæрттæ куы байгом кæна, уæд зæрондæй арæзт æрцæудзæн музей. Куыстытæ цæуынц, национ проект «Ахуырад» æххæст кæнгæйæ. Уыдзæн дзы 200 бынаты. Иу скъола ма аразынц Хъызлары. Уым та уыдзæн 500 бынаты. Цæмæй æртæуæладзыгон бæстыхай æмгъуыдмæ гæсгæ эксплуатацийы радтой, уый тыххæй Тускъаты Таймураз подрядон организацийæн бабар кодта фæллойгæнæг бригадты нымæц фæфылдæр кæнын. Хъызлары ма бындуронæй цалцæг кæнынц Культурæйы Хæдзар. Объект арæзт æрцыд 87-æм азы. Ныртæккæ йын баивтой йæ сæр. Хъæуы вентиляцион системæмæ базилын. Хицауады сæрдар бахæс кодта уæлæмхасæн хæрдзтæ банымайын. Сног кæндзысты Троицкæйы культурæйы хæдзар дæр. Куыстытæм бавнæлдтой дыууæ мæйы размæ, æмæ йæ фæуынмæ хъавынц ноябры. Ахæм куыст цæуы Сухотскæйы дæр. Уымæй дарддæр дзы байгом кодтой сывæллæттæн ирхæфсæн фæз. Территори фæзынд амалхъом адæмы фæрцы. Уый у Гæбулты бинонты лæвар. 800 квадратон метры фæзуатыл ис футболæй, баскетболæй хъазæн бынæттæ, турниктæ, тренажертæ æмæ æппæтæй кæстæртæн ирхæфсæнтæ. Тускъаты Таймуразы хъуыдымæ гæсгæ нæ сæйраг нысан у — æмбæлгæ уавæртæ аразын, нырыккон технологитæй пайда кæнгæйæ.
