Ныхас цыди республикæйы спорт парахат кæнынæн алыхуызон проекттæ царды уадзыныл
Тускъаты Таймуразæн онлайн-бастдзинадæй кусæг фембæлд уыди физкультурæ æмæ спорты министр Хуыгаты Аланимæ. Ныхас цыди республикæйы спорт парахат кæнынæн алыхуызон проекттæ царды уадзыныл. Уæвгæ цы снысан кодтой, уыцы пълантæ пандемийæ нæ бахъыгдæрдта. Хуыгаты Аланы ныхæстæм гæсгæ, ивгъуыд азы Цæгат Ирыстоны спортсменты къухы бафтыди стыр æнтыстытæ. Республикæмæ æрбаластой 300 майданы. «Спорты мастертæм кандидаты» ном саккаг кодтой 189 спортсменæн, «Уæрæсейы спорты мастертæ» систы 40-æй, 17 спортсменæн та радтой «Æпæтадæмон къласы спорты мастеры» кадджын ном. Министрад аккаг æмвæзадыл бацæттæ кодта 200 спортивон мадзалæй фылдæр. Хицауады сæрдары базонын фæндыди, йе нæниздзинад цудыд кæмæн у, уыцы фæсивæдæн спорты цы уавæртæ арæзт цæуы, уый. Уыцы категорийы адæм æнтыстджынæй архайынц уæгъдибар хъæбысхæсты, футболы, рог атлетикæйы, мысанмæ æхсыны, дзюдойы æмæ спорты æндæр хуызты. Фембæлды æрныхас кодтой регионы спортивон инфраструктурæйы фарстатыл дæр. Федералон проект «Демографи»-йы фæлгæты æлхæд æмæ æвæрд æрцыди нырыккон спортивон-технологон кусæнгæрзтæ. Республикæйы районты фæцис 11 бирæвæрсыг хъазæн фæзты арæзтад. Йæхи фæзтæ арæзт цæуынц Црауы, Предгорныйы æмæ Алагиры дæр. Уымæй уæлдай тагъд фæуыдзæн Дзæуджыхъæуы спортивон хъæбысхæсты тренировкæтæ кæнæн центры арæзтад дæр. Бæрнон кусджытæ се ргом аздæхтой Олимпаг хъæзтытæм цæттæ кæныны фарстатæм. Ацы хъуыддаг дæр зæрдæхсаинаг нæу. Тускъаты Таймураз бафарста футболы академи «Алани»-йы æрвылбоны куысты тыххæй. Ахуыр дзы кæны 12 курдиатджын лæппуйы Цæгат æмæ Хуссар Ирыстоны алы районтæй. Æвзонг футболисттæн санаторий «Осети»-йы ис æппæт уавæртæ, цæмæй сæхи æнкъарой иттæг хорз. Фембæлды архайджытæ ма æрныхас кодтой спорты иумæйаг портал æнæмæнгæй кæй хъæуы, ууыл. Йæ нысан у, республикæйы цæрджыты спортмæ разæнгард кæнын.
