Алчидæр сæ райста берет æмæ æвдисæндар
Уæллаг Фыййагдоны скъолайы 10 ахуырдзауы ард бахордтой æмæ бацыдысты отряд «Арæнхъахъхъæнæджы æвзонг хæлар»-ы рæнхъытæм. Алчидæр сæ райста берет æмæ æвдисæндар. Кадджын мадзалы архайдтой арæнхъахъхъæнæн службæйы кусджытæ, хæстон цауты ветерантæ æмæ бынæттон хицаудзинады оргæнты минæвæрттæ. Ныр рæзгæ фæлтæрмæ æнхъæлмæ кæсынц ахуыртæ физикон æмæ хæстон цæттæдзинадæй, стæй æфсæддон-спортивон мадзæлттæ. Бæлвырддæр радзурдзæн Хъайтмазты Дзерассæ.
8-æмкъласон Мæрзаганты Дианæйæн æфсæддон тематикæ рагæй у цымыдисаг. Куыд зæгъы, афтæмæй йын йæ сабибонтæй хæстæг у, йæ цард Фыдыбæстæ хъахъхъæнынимæ æмæ службæимæ чи сбаста, уыдоны истори. Уымæ гæсгæ скъолайы отряд «Арæнхъахъхъæнæджы æвзонг хæлар»-ы уæнг суæвыны гæнæн куы фæцис, уæд дзы уайтагъд спайда кодта. Йæ хæлæрттимæ ард бахордта. Ныр сæм уыдзæн ахуыртæ, тренировкæтæ, зонгæ кæндзысты арæнхъахъхъæнæджы дæсныйадимæ.
Кадджын мадзал уыд Фыййагдоны скъолайы актон залы. Лæппутæн æмæ чызджытæн раарфæ кæнынмæ æрбацыдысты арæнхъахъхъæнæн службæйы кусджытæ, ветерантæ, Афганистаны хæстон цауты æмæ сæрмагонд æфсæддон операцийы архайджытæ, стæй Фыййагдоны сæргълæууæг. Скъоладзаутæн уый сси фыццаг официалон къахдзæф ног змæлды.
æдæппæтæй ард бахордтой 10 скъоладзауы. Алчидæр сæ райста берет æмæ арæнхъахъхъæнæджы æвзонг хæлары æвдисæндар. Фидæны сын уый уыдзæн уæлæмхасæн æххуыс профилон æфсæддон уæлдæр ахуыргæнæндæттæм бацæугæйæ. Зæгъын хъæуы уый, æмæ отряд хицæн кълас нæу. Бацыдысты йæм алы кълæстæй лæппутæ æмæ чызджытæ. Иу сæ кæны хæстон службæмæ цымыдисдзинад æмæ арæнхъахъхъæнæджы дæсныйады тыххæй фылдæр базоныны фæндон. Ахуыртæ амондзысты арæнхъахъхъæнæн управленийы кусджытæ. Программæйы – хæстон æмæ физикон цæттæдзинад, арæнхъахъхъæнæн æфсæдты истори, æфсæддон-спортивон ерысты архайд.
Клуб «Арæнхъахъхъæнæджы æвзонг хæлар» кусы Алагиры дæр. æдæппæтæй Цæгат Ирыстоны ис 10 ахæм отряды æмæ иугонды. Архайы сæ 230 скъоладзауы онг.
