Ахæм хæс сын оперативон штабы рæстæг радта Сергей Меняйло
Уæрæсейы фæлхасадмæ цæстдарды управлени æмæ æнæниздзинадхъахъхъæнынады министрад кусынц Цæгат Ирыстоны территорийыл коронавирусы ныхмæ тох кæныны ног мадæлттыл. Ахæм хæс сын оперативон штабы рæстæг радта Сергей Меняйло. Республикæйы уавæр раздæрау у карз. Оперативон бæрæггæнæнтæм гæсгæ, ныртæккæ рынчындæтты ис мин 70 адæймагæй фылдæр. Æмбырды снысан кодтой, репсубликæйы спиды центры бындурыл ма ноджыдæр уæлæмхасæн сынтæджытæ равæрын. Александр Реутовы ныхæстæм гæсгæ, республикæмæ туаггуыр ласыны системæйы къулымпыдзинæдтæ нæй, процесс цæуы куыд æмбæлы, афтæ. Цæгат Ирыстон райста ковид раиртасыны тыххæй экспресс-тестытæ дæр. Сæ иу хай сын арвитдзысты тагъд æххуысы станцæмæ, нысан кæнынц 60 азæй уæлæмæ кæуыл цæуы, ахæм адæмæн тестытæ скæнын.
