Уыимæ куыд хъуыстгонд ахуыргæндтæн, афтæ æрыгон специалисттæн æмæ аспиранттæн
Уæрæсейы наукæйы боны кадæн нæ республикæйы арæзт цæуынц алыхуызон мадзæлттæ. Уыимæ куыд хъуыстгонд ахуыргæндтæн, афтæ æрыгон специалисттæн æмæ аспиранттæн. Уæвгæ, алы наукон къабазæн дæр ис стыр ахадындзинад. Зæгъæм – хъæууон хæдзарады. Ам наукæйы æнтыстджын къахдзæфтæй аразгæ у суанг нæ бæстæйы хойраджы æдасдзинад. Хæххон паддзахадон аграрон университеты цы мыггæгты селекцион центр кусы, уый стыр æвæрæн хæссы аграрон секторы рæзтмæ. Центры ма фæзынд нырыккон технологиты лаборатори. Бæлвырддæр хабæррæт радзурдзæн Фидараты Маринæ.
Техникон наукæты кандидат Шота Пицхелаури æвдисы йе рхъуыдыдзинад – сæрмагондæй хæххон уавæрты кусæг трицикл. Цæлхытыл рог æмæ æдас рог техникæ кæй нæй, уый зындзинæдтæ æвзарын кæны хъæууонхæдзарадон куыстуæттæн. Уымæ гæсгæ хæххон паддзахадон аграрон университеты бакуыстой фæлварæны дæнцæгыл. Уымæн йæ бон уыдзæн ацы фарста алыг кæнын. Теоретикон æмæ эксперименталон иртæстытæн ныр дæр сæ ахадындзинад бæрæг у.
Мототранспорты проектыл хæххон паддзахадон университеты кусынц бирæ азты. Ахуыргæндтæм ныридæгæн ис фæлварæны хуызы дæнцæгтæ. Сæрмагондæй бæлццæттæ ласынæн. Уыдон та сты, абарæн кæмæн нæй, ахæм конструкцитæ, хæххон уавæрты кусынæн.
Ног лаборатори нырыккондæр генетикон технологитимæ цæттæ кæнынц байгом кæнынмæ. Йæ кусджытæ ма архайынц фæстаг лыстæг хъуыддæгтæ фæуынмæ. Национ проект æххæст кæнгæйæ, хæххон паддзахадон аграрон университет уæлахиздзау сси, мыггæты селекцион центр саразыны конкурсы. Нæ республикæйы нырмæ ахæм центртæ нæ уыд. Бæрзондтехнологон кусæнгæрзтæ фадат ратдзысты селекци ног æмвæзадмæ ракæнынæн. Уæвгæ, хæстæгдæр фидæны лабораторийы фæзындзæн ног гæнæнтæ. Инновацион технологиты фæрцы специалисттæн сæ бон уыдзæн, зæгъæм, картофы генетикон ивддзинæдтæ иртасын. Кæд традицион селекцийы уыцы хъуыддагæн 4 азы хъæуы, уæд ныр та уыцы мгъуыд зынгæ фæкъаддæр уыдзæн.
Зонгæгæнæн лекци экономикон факультеты студенттæн арæзт æрцыд инновацион технологиты лабораторийы. Ныртæккæ цæттæ кæнынц йæ байгом кæнынмæ. Ам нырыккон кусæнгæрзты фæрцы фæсивæды ахуыр кæндзысты, бизнесы чи хъæуы, ахæм программæтæ аразыныл. Уымæй дарддæр фæахадгæдæр уыдзæн наукон-иртасæн куыст, – зæгъынц ахуыргæнджытæ. Инновацион технологиты къабазы ног компетенцитæ куы нæ рæзой, уæд экономисттæн уыдзæн зындæр кусын.
Цæгат Кавказы рагондæр уæлдæр ахуыргæнæндон – хæххон паддзахадон аграрон университетæн бындур æвæрд æрцыд революцийы фæстæ. 100 азæй фылдæр ам хъахъхъæд цæуынц раздæры традицитæ. Уæд та, кæй зæгъын æй хъæуы, наукæ æмæ рухстауынад уыдысты фыццаг бынаты.
