Нæ бæстæйы уыдоныл нымад сты, канд хъахъхъæд чи цæуы, ахæм территоритæ нæ, фæлæ ма наукон уагдæттæ дæр
Уæрæсейы сбæрæг кодтой фæдзæхст бынæтты æмæ национ паркты бон. Нæ бæстæйы уыдоныл нымад сты, канд хъахъхъæд чи цæуы, ахæм территоритæ нæ, фæлæ ма наукон уагдæттæ дæр. Уыдоны фæрцы æнтысы нæ алфамбылай дунеимæ зонгæ кæнын æмæ йæ хъахъхъæнын. Цæгат Ирыстоны паддзахадон фæдзæхст бынат схонæн ис нæ республикæйы æрдзон хæзнаты хсæн цыкурайы фæрдыг. Йæ кусджытæ та нымад сты зайæгойты æмæ цæрæгойты дунейы абарæн кæмæн нæй, ахæм хуызты хъахъхъæнджытыл. Зæгъæм, фæдзæхст бынаты цæрæгойты дунемæ хауынц 58 хуызы сырдтæ. Уыдонæй 7 хуызы хаст æрцыдысты Сырх чиныгмæ. Æппæты стырдæртæ сты хъæддаг галтæ. Зубрты нымæц ныртæккæ фæдзæхст бынаты хæццæ кæны 100-йæ фылдæрмæ. Уыдонæй дарддæр дзы ис сагтæ, дзæбидыртæ, хъæддаг гæдытæ æмæ леопардтæ. Мæргътæ та дзы ис 207 хуызы. Сырх чиныгмæ дзы хаст æрцыд 24-æй. Уæдæ æнæ зæгъгæ нæй хъæздыг флорæйы тыххæй дæр. Мин æмæ рдæг зайæгойы хуызæй фылдæр. Фæдзæхст бынаты доны объектты та парахат кæны балер кæсаг. Туристтæн арæзт æрцыдысты сæрмагонд къахвæндæгтæ. Конд сты, куыд иу боны маршрутæн, афтæ стыр балцытæн дæр. Ивгъуыд азы кæрон фæдзæхст бынаты байгом ног экологон къахвæндаг. Комапни РусГидро цалдæр хуызмæ гæсгæ кæны хæрзаудæн куыст. Сæ иу у – экологон, æмæ у, энергетиктæ кæуыл бакуыстой, ахæм цыппæрæм маршрут нæ республикæйы. Ацы аз ма фæдзæхст бынаты территорийы фæзындзæн ноджыдæр дыууæ аивгонд объекты.
