Ахуырдзаутæ лекци бабæрæг кодтой юридикон факультеты дыккæгæм курсы студенттимæ иумæ
Уголовон барады лыстæг хъуыддæгтыл радзырдтой скъоладзаутæн Цæгат Ирыстоны паддзахадон университеты. Ахуырдзаутæ лекци бабæрæг кодтой юридикон факультеты дыккæгæм курсы студенттимæ иумæ. Ахæм цымыдисаг ахуыртæ арæзт фæцæуынц уæлдæр ахуыргæнæндоны æппæт факультетты. Афтæмæй æххæст кæнынц профориентацион проект «Иу бонмæ студент». Республикæйы скъолаты рауагъдонтæй дарддæр ма проекты архайыны бар ис астæуккаг профессионалон ахуыргæнæндæтты минæвæрттæн дæр. Къуырийы дæргъы скъоладзаутæ цæудзысты Цæгат Ирыстоны паддзахадон университеты лекцитæм, практикон æмæ лабораторон ахуыртæм. Уый фидæны абитуриенттæн баххуыс кæндзæн дæсныйад равзарынæн, университеты куыстимæ базонгæ уæвынæн, æмæ фæсивæдæн сæхи студенты хуызы бафæлварæнын. Профориентацион мадзал фыццаг хатт арæзт не рцыд. Йæ архайджыты нымæц та азæй-азмæ кæны фылдæр.
