Йæ архайджытæ хатдзæгтæ скодтой сæ афæдзы куыстæн, стæй æрдзырдтой 2021 -æм азы сæ архайды сæйрагдæр къабæзтыл
Уыд Дзæуджыхъæуы муниципалон сконды Æхсæнадон советы президиумы фыццаг æмбырд. Йæ архайджытæ хатдзæгтæ скодтой сæ афæдзы куыстæн, стæй æрдзырдтой 2021 -æм азы сæ архайды сæйрагдæр къабæзтыл. Советы сæрдар Михаил Шаталов æмбырды райдиан раарфæ кодта йæ хæдивæг Хъуысаты Тимурæн, ногæй йæ республикæйы журналистты цæдисы сæрдарæй кæй сæвзæрстой, уый фæдыл. Дарддæр æмбырды уæнгтæ раргом кодтой, горæты цæрджытæй цы хъуыдытæ æмæ фæндтæ æрбацыд, Дзæуджыхъæуы цардархайд фæхуыздæр кæныны фæдыл, уыдон. Михаил Шаталов дæнцæгæн æрхаста горæты цæрæджы фыстæгæй скъуыддзаг. Фæнды йæ, цæмæй фылдæр æргом здæхт æрцæуа Дзæуджыхъæуы рагон хайы хуыз æмæ культурон бынтæ бахъахъхъæныны фарстамæ. Президиумы уæнгтæ рахæцыдысты йæ фæндоныл – архитектортæ Карл Шмидт, булкъон Михаил Ерофеев æмæ Цæгат Ирыстоны æндæр зындгонд адæмы нæмттæ сæнусон кæнын. Советы æмбырды ма рахастой фæндон – Дзæуджыхъæуы æмæ йæ префектурæты разамындтæй ракурын, цæмæй бирæуæладзыгон хæдзæртты саразой æхсæнадон советтæ. Уыдон алы æмвæзады муниципалон хицаудзинады оргæнтæн æххуыс уыдзысты, сæ районты цардархайды фарстатæ лыг кæнынæн. Советы фароны азы куысты хатдзæгтæм гæсгæ хъуамæ каст æрцæуа йæ уæнгтæм. Сæрмагонд курдиæттæ æрвыст æрцæудзысты горæты сæргълæууæг Икъаты Русланбегмæ.
