Бынæттон администрациты сæргълæууджытæн республикæйы разамонæг бабар кодта, цæмæй фæахадгæдæр кæной рейды мадзæлттæ æмæ цæрджытимæ амонæн куыст
Адæмы æнæниздзинад æмæ æдасдзинадмæ фылдæр æргом здахын, маскæ дарыны фæтк куыд æххæстгонд цæуы, уымæ цæст дарын æмæ коронавирусы инфекци дарддæр парахат кæнын ма бауадзын — ацы фарстатыл оперативон æмбырды рæстæг дзырдтой Битарты Вячеслав æмæ республикæйы æххæстгæнæг оргæнты разамонджытæ. Бынæттон администрациты сæргълæууджытæн республикæйы разамонæг бабар кодта, цæмæй фæахадгæдæр кæной рейды мадзæлттæ æмæ цæрджытимæ амонæн куыст. «Кæд рынчынты нымæц бонæй бон къаддæр кæны, уæддæр нæ нырма хъæуы æххæст кæнын цæтæдзинады фæтк, цæмæй адæмы æнæниздзинад бахъахъхъæнæм, уый тыххæй» – бахахх кодта Битарты Вячеслав. Æмбырды рæстæг дзырдтой мæгуырдзинадимæ тохы программæйы тыххæй дæр. Фæллой æмæ социалон райрæзты министр Хуыбаты Барис куыд фехъусын кодта, афтæмæй социалон бадзырдтæ бафысдзысты 678 фæкæсынхъуаг бинонтимæ. Уыцы мадзал сын баххуыс кæндзæнис сæ цæрыны уавæртæ фæхуыздæр кæнын æмæ куысты бынæттæ ссарын. Афæдзы кæронмæ социалон бадзырдтæ бафысдзысты иу мин адæймагæй фылдæримæ. Фæсивæды политикæйы къабазы цы куыст цæуы, уый тыххæй радзырдта профилон комитеты сæрдар Джусойты Руслан. Йæ ныхæстæм гæсгæ уал ныридæгæн сæххæст кодтой фæсивæды экономикон архайдмæ æмхиц кæныны программæйы фыццаг къæпхæн.
