Ахæм æмвæзады ерыстæ, ам арæзт æрцыдысты фыццаг хатт, фæлæ мадзалы уазджыты ныхæстæм гæсгæ та рабæрæг фæстаг кæй нæу, уый
Ирыстоны æгъдау æмæ адæмуарзондзинад фæхастой сæ удты. Велосипедтыл ерыстæ «Цæгат Кавказы адæмты хæлардзинад»-ы архайджытæ разыйæ баззадысты ирон адæмы уазæгуарзондзинадæй. Фæндзæм къæпхæны финал арæзт æрцыд Æрæфы районы Хæзныдоны хъæуы Хъамболты Созой номыл спортивон – дзæбæхгæнæн комплексы. Ахæм æмвæзады ерыстæ, ам арæзт æрцыдысты фыццаг хатт, фæлæ мадзалы уазджыты ныхæстæм гæсгæ та рабæрæг фæстаг кæй нæу, уый. Бæстондæр нын мадзалы кой ракæндзæн Сосранты Жаннæ.
Афтæ хъæлдзæгæй æнхъæлмæ кастысты Уæрæсейы фелосипедтыл ерысты чемпионаты архайджытæм Хæзныдоны стадионы.
Цалынмæ Ерысты фæндзæм къæпхæны архайджытæ цыдысты Дзæуджыхъæуæй Лескенмæ, стæй фæстæмæ Хæзныдонмæ, уæдмæ спортивон-дзæбæхгæнæн комплексы фæз сси бæрæгбоны фæз. Ам спортменты æрбацыдмæ æнхъæлмæ кастысты, куыд кадджын уазджытæм, афтæ.
Уæвгæ велосипедтыл ерыстæ «Цæгат Кавказы адæмты хæлардзинад» арæзт цæуынц 1992-æм азæй. Ацы хатт рахастой дæс боны. Цæгат Кавказы цыппар регионы фæндæгтыл рацыдысты сæ къæпхæнтæ. Ерыстæн ис Уæрæсейы чемпионаты статус. Бацархайдта дзы 120 велосипедисты уæрæсей алы регионтæй.
Ерысты фæндзæм къæпхæн, Дзæуджыхъæу – Лескен – Хæзныдон, спортсменты ныхæстæм гæсгæ, уыд тæккæ райдзастдæр æмæ цымæдиссагдæр. Ирыстоны уазæгуарзондзинад та сæ зæрдæты лæудзæн алкæд. Фæнды ма сæ, æнæмæнг, бабæрæг кæнын ацы бынæттæ.
Велосипедтыл ерыстæ «Цæгат Кавказы адæмты хæлардзинад» саразджытæ, Уæрæсейы велосипедон спорты федерацийы уæнгтæ, тынг разыйæ баззадысты Цæгат Ирыстон фæндæгтыл æдасæй цæуыны Паддзахадон инспекцийы кусджыты архайдæй. Сæ фæрцы трассæйыл æнцонтæй цæуæн уыд велосипедисттæн.
Фæбæрæг кæнын хъæуы уы, æмæ ам ныхмæлæуддзинад карз кæй,уыди. Спортсментæн ис иттæг хорз спортивон цæттæдзинад. Алкæйы дæр дзы фæндыд хорз бæрæггæнæн равдисын. Хæзныдоны схорзæхджын кодтой ерысты фæндзæм къæпхæны уæлахиздзауты. Хæрзиуджытæ радтыны бар лæвæрд æрцыд мадзалы кадджын уазджытæ æмæ йæ саразджытæн.
Велосипедон спорт æрмæст дугъ æмæ ерыстæ кæй не сты, уый федтой Хæзныдоны стадионмæ æрбацæуджытæ. Ам сын арæзт æрцыд вмх –велосипедтыл сæрмагонд равдыст. Архайдтой дзы Уæрæсейы велосипедон спорты иугонд командæйы уæнгтæ. Сæрмагонд, спортивон фæндаджы фæрцы Уæрæсейы зындгонд велосипедисттæ адæмы дисы бафтыдтой сæ сарæзт трюктæй. Ахæм равдыст ма арæзт æрцыд Налцыччы, Майкопы æмæ Черкескы цæрджытæн.
Хæзныдоны ацы стадион арæзт æрцыд йæ рацæуæг, хъæуы кæстæрты рухс фидæныл архайæг Хъамболты Мараты хъæппæрисæй. Ныр, йæ фæрцы, Æрæфы районы Хæзныдоны хъæуы ис саразæн стыр æмвæзады ерыстæ æмæ мадзæлттæ. Цæгат Ирыстоны спорты Министр Къочиты Сосланы ныхæстæм гæсгæ ма ам араздзысты бæрзонд æмвæзадыл ерыстæ.
Мадзалы архайджытæ æнæрхъуыдыйæ нæ ныууагътой Хъамболты Созойы номыл спортивон – дзæбæхгæнæн комплексы кæрты цы мады цыртдзæвæн ис, уый. Сæвæрдтой йыл дидинджытæ.
Хæзныдоны велосипедон ерысты финал зæрдæмæдзæугæ саразыныл стыр куыст бакодта Паддзахадон физкультурон –спортивон иугонд «Юность России»-йы. Йæ сæрдар Абайты Алан раарфæ кодта ерысты æппæт архайджытæн, стæй фехъусын кодта Хæзныдоны цæрæг сывæллæттæн æхсызгон хабар. Ам, стадионы кæй гом кæнынц велосипедтыл цæуыныл ахуыр кæныны секци. Ныридæгæн йын балхæдтой велосипедтæ.
Æрæфы районы культурæйы галуаны коллектив та бацæттæ кодта музыкалон программæ. Æрæфы районы админисраци æмæ Хæзныдоны амалхъом адæмы фæрцы та мадзалы æппæт архайджытæн арæзт æрцыд бæрæгбоны фынгтæ.
Æмбæлы зæгъын, велосипедтыл ерысты цы 120 архайæджы уыд, уыдоны географи куыд парахат уыд, афтæ рапарахат уыдзæн Ирыстоны адæмуарзондзинад æмæ рæдаудзинады кой.
