Уый тыххæй аппаратон æмбырды фехъусын кодта Цæгат Ирыстоны Сæргълæууæджы хæстæ рæстæгмæ æххæстгæнæг
Владимир Путин æмæ Сергей Меняйлойы фембæлды фæстæ Уæрæсейы хицауадмæ бацæттæ кодтой 9 амынддзинады. Рады ма ис 3. Уый тыххæй аппаратон æмбырды фехъусын кодта Цæгат Ирыстоны Сæргълæууæджы хæстæ рæстæгмæ æххæстгæнæг. Куыд радзырдта, афтæмæй сæйраг нысан у – президенты амынддзинæдтæ бæлвырд хъуыддæгтæм раздахын. Уыимæ бæрнон адæм хъуамæ аразой бындурон мадзæлттæ. 2022-æм азы сын хъуамæ бавæрой фæрæзтæ. Ныхас цыд Беслæны социалон-экономикон рæзтыл дæр. Сергей Меняйло хицауады ргом аздæхта куыстыты рад æххæст кæнынмæ æмæ сæ хæрзхъæддзинадмæ. Пъланмæ гæсгæ уал хъуамæ базылдаиккой фæндаггон хызмæ. Уый фæстæ та хъуамæ инженерон куыстытæм бавналдтаиккой. Республикæйы разамонæг бадомдта, программæтæ æххæст кæныны æмгъуыдмæ ногæй æркæсын. Уымæй дарддæр ма Сергей Меняйло паддзахадон исбоны министрадæй ракуырдта, сæ хицæуттæ кæмæй нæ пайда кæнынц, уыцы зæххытæ æмæ исбон республикон æмæ федералон бæрнмæ раздахын. Уыдон сты Офицерты хæдзар, кинохроникæйы бæстыхай стæй Беслæны бæхты завод. Афтæ хæстæгдæр рæстæг хъуамæ арæзт æрцæуа кадастрон картæ.
