Бынатмæ сæ бахæццæ кæнынæн æххуыс кæнынц Адæмон фронты минæвæрттæ
Змæлд «Шьем и вяжем для наших. С любовью из Осетии»-йы волонтертæ дарддæр æххуыс кæнынц сæрмагонд æфсæддон операцийы архайджытæн. æрвылбон цæттæ кæнынц фронтæн хъæугæ дзаумæттæ. Бынатмæ сæ бахæццæ кæнынæн æххуыс кæнынц Адæмон фронты минæвæрттæ. Бæлвырддæр радзурдзæн Хъайтмазты Дзерассæ.
Хъуымацы лентытæ, хæсгæрдтæ æмæ километргай маскировкæгæнæн хызтæ. Ам куыст иу бонмæ дæр не рлæууы. Змæлд «Шьем и вяжем для наших. С любовью из Осетии»-йы волонтертæ æрвылбон æрæмбырд вæййынц æрмадзы. Сæ архайды рæстæгмæ сæрмагонд æфсæддон операцийы зонæмæ арвыстой мингай маскировкæгæнæн хызтæ, абон та ма цæттæ кæнынц сæрмагонд зонтиктæ. Уыдон хæстонты æмбæхсынц дронтæй. Волонтерты хсæн 85-аздзыд Лидия Гугуева дæр. Хæсты сывæллон хорз хъуыды кæны, саби уæвгæйæ немыцæгтæй куыд æмбæхстысты, Уæлахизыл куыд сæмбæлдысты, уый. Абон йæхæдæг дæр йæ бон цы у, уый кæны ног уæлахиз æрбахæстæг кæныны тыххæй.
Цалдæр хуыйæн стъолы, хуыйæн машинкæтæ æмæ пайдайаг уæвыны фæндон. Уымæй райдыдта волонтерты иугонды куыст. Абон ам хуыйынц хæстонтæн хъæугæ уæлæдарæс. Алы дзаумайыл дæр сæрмагонд биркæ «С любовью из Осетии». æппæтæй хистæр æрмдæсныйыл цæуы 90 азы. Дзансолты Тамарæ æрмадзмæ куы æрбацыд, уæд хуыйын бæлвырд нæ зыдта. Абон къуыримæ бахуыйы 17 маскировкæгæнæн халаты.
Вера Бартелæн фронтæн æххуыс сси йæ царды хай. Йæ цардæмбал æмæ æфсымæр фыццæгты æмрæнхъ араст сты сæрмагонд æфсæддон операцийы зонæмæ. Уæд сæвзæрд, фронты чи ис, уыдонæн æххуыс кæныны хъуыды. Абон волонтерты змæлды ис 30 зæрдæхæлар адæймаджы.
Цæттæ дзаумæттæ архайынц, фæллад уадзынмæ хæдзармæ чи ссæуы, уыцы хæстонтæн комкоммæ дæттыныл, фæлæ арæхдæр гуманитарон æххуыс фæхæццæ кæныны хъуыддаджы феххуыс кæнынц адæмон фронты минæвæрттæ. Уыимæ æрмдæснытæ фæллой кæнынц лæвар. Сæ рæстæг æмæ сæ хъарутæ не вгъау кæнынц, фронты чи ис, уыцы хæстонтæн.
Ныртæккæ та волонтертæ фæнд кæнынц ногæй райдайын медицинон хæссæнтæ цæттæ кæнын. Сæ сæйраг нысан у, цæмæй хæстонтæ æнкъарой, сæ райгуырæн зæххыл сæм кæй æнхъæлмæ кæсынц, уый.
