Сергей Меняйло фæнысан кодта, боныхъæды тыххæй республикæйы районтæ арæх æнæ рухсæй кæй баззайынц, уый
Зынгсирвæзтытæй тæссаг сезон, донивылдтытæ æмæ коронавирусы уавæр. Ацы темæтæ сæйрагдæртæ уыдысты аппаратон æмбырды. Разымынд ын лæвæрдта Сергей Меняйло. Архайдтой дзы æххæстгæнæг хицаудзинады æмæ бынæттон хиуынаффæйады оргæнтæ. Хицауады сæрдары хæдивæджы хæстæ æххæстгæнæг Томайты Ирбег радзырдта, Мæздæджы 9-æм майы боныхъæды аххосæй кæй æртыдтой электрон тыхдæттæг хæтæлтæ. Советскийы поселок баззади æнæ донæй, Хурыхъæу та æнæ рухсæй. Районы разамонæг Гугиты Геннадий куыд загъта, афтæмæй къæвдайы æмæ тыхджын дымгæйы аххосæй, аварион службæтæн куыстытæ райдайынæн æвæстиатæй гæнæн нæ уыди. Сергей Меняйло фæнысан кодта, боныхъæды тыххæй республикæйы районтæ арæх æнæ рухсæй кæй баззайынц, уый. Аварион службæты цæттæдзинад ис ныллæг æмвæзадыл æмæ уыцы хъуыддаг хъæуы сраст кæнын. Æппæт социалон объекттæ дæр хъуамæ ифтонггонд æрцæуой уæлæмхасæн электрон тыхæй. Уæлдайдæр та рынчындæттæ, ацæргæ адæмы хæдзæрттæ, сывæллæтты рæвдауæндæттæ æмæ скъолатæ. Хæстæгдæр рæстæг, профилон куыстуæттæ хъуамæ бакусой ацы фарстайыл. Æмбырды кæронбæттæн, Сергей Меняйло бузныг загъта æппæт ведомствæтæн, бæрæгбæтты куыд бакуыстой, уый тыххæй. Уымæй уæлдай, дзуапдæттæг оргæнтæн бахæс кодта, цæмæй сæ цæст дарой, адæмы архайдмæ культурон-дзыллон мадзæлтты рæстæг, бæлвырддæр та хъуамæ æххæстгонд цæуой фæлхасадмæ цæстдарды службæйы домæнтæ.
