Уарзондзинад у хæзнаты хæзнадæр, уый, зæгъынц, адæймагæн у зæдтæ æмæ дауджыты лæвар. Уарзондзинад у иууыл бæрзонддæр æнкъарæнтæй, зæрдæ сыгъдæг æмæ хъæздыг кæмæй кæны, рæсугъд æмæ сгуыхт хъуыддæгтæм разæнгард чи кæны, ахæм тых. Уарзондзинад цы зæххыл ис, цард æмæ амонд дæр уыцы зæххыл сты.
Фыдæлты бæстæ, зæгъынц, хуры бæстæ у. Кæмфæнды куы цæрай, уæддæр дæ дæ зæрдæ уырдæм хæсдзæн. Абысалты Хъырымы –фырт Кайя у Турчы цæрæг ирон адæмæй иу.Уый æнæкæрон уарзтæй уарзы нæ ирон зæхх, нæ фæндырдзагъд æмæ нæ зарджытæ. Ирыстонмæ куы рбацæуы, уæд сывæллонау фæцин кæны нæ урссæр хæхтыл, нæ адæмыл, нæ ирон сныхасыл. Ирыстон у æппæт ирон адæмæн дæр не стыр Мад. Ирыстон, нæ рæсугъд, нæ уарзон хæдзар!
Ирон лæгдзинадыл бирæ дзурæн ис. «Лæгдзинад дзыхы ныхасæй нæу». «Хъуыддагæн лæг хъæуы». «Лæг хъуамæ лæгдзинадæй лæг уа, æндæра рихитæ гæдыйыл дæр ис». Махæн нæ фыдæлтæ уыдысты ныфсхаст, растдзырд, сæрибаруарзаг, хистæртæм хъусаг, фæразон, кадыл мæлæг.
Ацы зæххыл æнусон ницы ис, фæлæ иу фæлтæр иннæ фæлтæрмæ цы фарн æмæ цы хорздзинад дæтты, æнусон сты æрмæстдæр уыдон. Хистæр кадджын кæм у, кæстæр – æгъдаудæттæг, уым ирон фарнæн сæфæн нæй.
