Контрактмæ гæсгæ объект хъуамæ эксплуатацийы радтой 15-æм августмæ
Ахуыргæнæн чингуытæй дарддæр ма ног цалцæггонд скъолайыл бацин кæндзысты Цыколайы 2-æм скъолайы ахуырдзаутæ. Контрактмæ гæсгæ объект хъуамæ эксплуатацийы радтой 15-æм августмæ. Ныртæккæ аразджытæ бавнæлдтой мидæггаг аивгæнæн куыстытæм.
Цыколайы 2 къуырийы размæ райдыдтой дыккæгæм скъолайы бындурон цалцæггæнæн куыстытæ. Цæуынц, дыууæ мины æхсæрдæсæмæй – дыууæ мины дыууынæм азты ахуырады рæзты нысанмæ арæзт федералон программæ æххæст кæнгæйæ. Раздæры бæстыхайæ ам баззадысты йæ хуыз æмæ пълан. Иннæ хъуыддæгтæ иууылдæр сног кæндзысты. Баивдзысты хъармдæттæг æмæ дондзæуæн системæтæ.
Скъолайы сæр æххæстæй баивтой, сæвæрдтой рудзгуытæ æмæ йæм бауагътой электрон тых. Аразджытæ бавнæлдтой мидæггаг куыстытæм. Ныры онг цалцæг цыди сæйраг ахуыргæнæн корпусы. Ацы мæйы та райдайдзысты иннæ бæстыхайы кусын. Уым ис актон æмæ спортивон залтæ стæй хæрæндон. Бындурон цалцæг хъуамæ фæуа цыбыр æмгъуыдмæ. Контрактмæ гæсгæ объект хъуамæ эксплуатацийы радтой 15-æм августмæ.
Ног аивгонд скъола райдзаст æмæ æнцонвадат кълæстимæ хъуамæ скуса сентябры.
