Бæстыхай арæзт æрцыд хицæн проектмæ гæсгæ. Уавæртæ дзы скодтой ахуырæн, фæллад уадзынæн æмæ спортæн.
Дзæуджыхъæуы 12-æм микрорайоны йæ дуæрттæ байгом кодта ног ахуырады центр «Интеллект». Бæстыхай арæзт æрцыд хицæн проектмæ гæсгæ. Уавæртæ дзы скодтой ахуырæн, фæллад уадзынæн æмæ спортæн. Объект конд у 3 хицæн хайæ: райдиан, астæуккаг æмæ хистæр кълæстæн. Уæдæ дзы æппæт фадæттæ ис, йе нæниздзинад хъыгдард кæмæн у, уыцы сывæллæттæн дæр.
Ахуыргæнæн чингуытæ хицæнæй æвæрд, журнал фыст, фæйнæгыл та «Æгасцуай». Ацы ахуыры аз Анастасия Тарасьянцæн уыдзæн фыццаг, ахуыргæнæджы хуызы. 15 азы размæ ахуыр кодта прогимназ «Интеллекты». Æмæ ныр, университет фæуыны фæстæ, æрбацыд ног ахуырадон центр «Интеллектмæ», англисаг æвзаджы ахуыргæнæгæй.
Егъау рацарæзты куыстытæ, æмæ ныхас канд бæстыхайыл нæ цæуы. Раздр уыд райдиан кълæсты скъола, æмæ куыста сывæллæтты рæвдауæндоны бындурыл. Ныртæккæ та æххæст ахуыргæнæндон материалон-техникон бындуримæ.
Фыццаг дзæнгæрæг ацы аз азæлыд «Интеллект»-ы 700 ахуыргæнинагæн.
Ахуырдзаутæн æмæ педагогтæн раарфæ кодта Битарты Вячеслав. Цæгат Ирыстоны сæргълæууæг куыд загъта, афтæмæй ног ахуыргæнæн центр хъуамæ суа нæ республикæйы фидæны кадрты куырдадз.
Бæрæгбоны линейкæйæ кæстæртæ бацыдысты кълæстæм. Кабинеттæ сифтонг кодтой тæккæ нырыккондæр техникæйæ. Зæгъæм, технологийы кабинеты лæппутæ æмæ чызджытæн фадат уыдзæн кусæг дæсныйæдты сусæгдзинæдтæ базонынæн. Уымæй дарддæр Интеллекты кусдзысты сфæлдыстадон къордтæ æмæ спортивон секцитæ.
Ацы аз партæты уæлхъус сбадтысты 700 сывæллоны. Сæ фылдæр рацыдысты прогимназ «Интелект»-æй. Иннæ аз та ахуыргæнæн центрмæ ахуырдзауты исдзысты сæ цæрæн бынæттæм гæсгæ. Чи зоны, æмæ сæ нымæц фæфылдæр уыдзæн.
