Халсартæ зайын кæныны республикон программæ фермертæн фадат радта хæдзарæдтæ фæхуыздæр кæнынæн
Гранттæ чи райста, уыдон æмбырд кæнынц сæ тыллæг. Халсартæ зайын кæныны республикон программæ фермертæн фадат радта хæдзарæдтæ фæхуыздæр кæнынæн. 900 мин сомы грант райсгæйæ амалхъом адæм балхæдтой нырыккон æфсæйнаг конструкцитæ. Бæлвырддæр радзурдзæн Хъайтыхъты Фатимæ.
Раздæр Бибойты Фатимæйы бинонтæ басгæрдæджытæ зайын кодтой хиконд хъæрмуаты. Фæлæ куыд фæстæдæр, афтæ сын уыцы чысыл зæххы гæппæл нал фаг кодта. Цас хуыздæр тыллæг-иу систой, уыйбæрц тынгдæр сæ-иу æрфæндыдис сæ чысыл хæдзарад фæуæрæхдæр кæнын. Фарон Фатимæ балæвæрдта курдиат халсартæ хъæрмуаты зайын кæныны райрæзты республикæйы программæмæ. Райста грант æмæ ныртæккæ йæ ног егъау хъæрмуаты зæрдиагæй æмбырд кæны джитъриты тыллæг.
Джитъритæ саддзысты Хъоротæ дæр. Хъæрмуаты алцыдæр у цæттæ: донæфсадæнтæ, дондзæуæнтæ æмæ ма суанг талатæм дон æртæхгай дæттыны системæ. Хъоротæ зæрдиагæй бацархайдтой, цæмæй сæ фидæны тыллæгæн æппæт уавæртæ саразой. Сæ хъуыдымæ гæсгæ, ацы хъуыддагмæ куыдфæндыйы цæстæй кæсæн нæй. Цас фылдæр уд бавæрай дæ фæллойы, уыйбæрц хуыздæр тыллæг сисдзынæ къанæг зæххы хайæ дæр.
Гранты хицæуттæн сæ ахсджиаг хъуыддаджы æххуыс кæнынц Ирыстоны раззагдæр агрономтæ. Уыдонæй уæлдай зæхкусджытимæ амонæн куыст кæнынц республикæйы хъæууон хæдзарады управлениты минæвæрттæ.
Цæгат Ирыстоны халсартæ хъæрмуаты зайын кæныны райрæзты республикæйы программæмæйы руаджы гранттæ райстой æртын æртæ хæдзарады. Уыдонæй æрмæст Æрыдоны районы ис цыппар. Паддзахадон фарсхæцты бæрц у фараст сæдæ мин сомы.
Халсартæ хъæрмуаты зайын кæныны райрæзты республикæйы программæмæ банымадтой хъæугæ æмæ ахсджиагыл. Проект дæтты гæнæн бинонтæн сæхи хъæууон хæдзарады къабазы бафæлварын, республикæйы бюджетмæ се вæрæн баæссын æмæ бынæттон фæлхасгæнджыты хæрзхъæд продукцийæ сæххæст кæнын. Куыд рабæрæг, афтæмæй ирон фермерты продукци æлхæнджытæ агурынц уæлдай зæрдиагæй.
