Уый у республикæйы агропромышленнон комплексы фыццаградон хæстæй иу
Дыргъты æмæ халсарты куыст кæнын, бæлвырддæр та дзы консервты продукци аразын. Уый у республикæйы агропромышленнон комплексы фыццаградон хæстæй иу. Ахæм куыстуæттæй иу бабæрæг кодта хъæууон хæдзарады министр Къусраты Алан. Ацы сезон дзы бакуыстой 4 сæдæ тонны продукци. Паддзахадон æххуысы фæрцы сæ къухы фты рауагъдадон бындур фидардæр кæнын. Бæстондæр радзурдзæн Касаты Наирæ.
Афæдзмæ 4 сæдæ тонны бакуыст продукци – ахæм у ацы куыстуаты архайды хатдзæг. Сезонты хсæн фæкæнынц фæткъуыйы куыст, сезоны тæмæны та бакусынц халсарты 32 хуызы. Æрзайын сæ кæнынц республикæйы территорийы, зæгъæм, джитъритæ, пъæмидортæ, цывзыйы сыфтæ, давон æмæ афтæ дарддæр, стæй дыргъты алыхуызтæ.
Республикæйы хъæууон хæдзарады министр Къусраты Алан бабæрæг кодта куыстуат. Фембæлды æрдзырдтой заводы гæнæнтыл, стæй йын йæ архайд ноджыдæр фæуæрæхдæр кæныны мадзæлттыл.
Куыстуат архайын райдыдта 2020-æм азы. Уыцы рæстæгмæ сæм заводæй уæлдай фæзынди скълæдтæ, стæй сæ продукци кæм уæй кæной, ахæм бынæттæ. Консервон продукци парахат кæнынц æрмæст республикæйы нæ, фæлæ йæ рвитынц бæстæйы æндæр регионтæм дæр.
Дыргътæ æмæ халсарты куыст кæм кæнынц, ахæм куыстуæттæ ныртæккæ республикæйы бирæ ис. Къусраты Алан куыд зæгъы, афтæмæй халсарты куыстгæнæн къабазы рæзтæн æппæт æмбæлгæ уавæртæ нæй, ома, тагъд чи хæлы, ахæм продукттæ кæм дарой, ахæм бынæттæ нæ фаг кæнынц. Уымæ гæсгæ стыр æргом аздахын хъæуы ацы хъуыддагмæ.
Заводы афæдзæй-афæдзмæ уæрæхдæр кæнынц сæ гæнæнтæ. Ацы аз фæнд кæнынц уæлæмхасæн скълæдтæ саразын, стæй продукцийы ног хуызтæ консерваци скæнын.
