Экономикон рæзты зонæты программæйы резиденттæ цæттæ сты сæ куыст райдайынмæ
Ныхасæй – хъуыддагмæ. Экономикон рæзты зонæты программæйы резиденттæ цæттæ сты сæ куыст райдайынмæ. Хæстæгдæр рæстæг Доныфарсы скусдзæн диориты куыстгæнæг карьер, Уыналы та æхсыры завод. Æнтыстджын бизнесæн дзы æппæт фадæттæ дæр сарæзтой. Бæлвырддæр – Фидараты Маринæ.
Нырма уал ацы кусæнгæрзтæ æнхъæлмæ кæсынц, сæ архайд кæд райдайдзæн, уымæ. Уæвгæ сæ бирæ æнхъæлмæ кæсын нал хъæуы. Уыналы æхсырыкуыстгæнæг заводы процессы технологи фыст у æппæт лыстæг хъуыддæгтæ хынцгæйæ. Хомаг исдзысты сæрмагонд хæтæлты уылты. Алкæцыйы дæр цæуы 600 литры. Кусæнгрæзтæ конд сты Европæйы æмæ Уæрæсейы. Монтаж фæци ацы бонты.
Ам ма ис, уæлдай тæф чи айсы, ахæм кусæнгарз – деаэратор. Йæ фарсмæ сæрмагонд пресс. Уый фæрцы уыцы-иу рæстæг базилæн ис 24 цыхтмæ. Уый та зынгæ тагъддæр кæны процесс. Цы æхсыры продукци дзы уадздзысты, уый канд бынæттон фæлхасгæнджытæн нæу, фæлæ ма йæ ласдзысты æндæр регионтæм дæр.
Куыстуатæн йæхицæн уыдзæн лаборатори. Инвестицион проекты аргъ фыццаг къæпхæны у 20 милуан сомæй фылдæр. Уыдонæй 12 сты хъæууон хæдзарады министрады гранты хуызы, фæрæзты иннæ хай та – микрофинансты фонды льготæтæм гæсгæ кредит. Царды йæ уаддзысты 5 азы дæргъы. Уыимæ ма проект сси экономикон рæзты зонæйы программæйы резидент. Хаст ма йæм æрцыдысты 6 фосдарæн фермæйы.
Ахæм гæнæнтæй спайда кæныны фадат ис Уаниты Викторæн дæр. Йæ компани архайы Доныфарсы диориты куыстгæнæг карьер саразыныл. Проекты аргъ у 250 милуан сомы аргъ. Йæ фæрцы Æрæфы районы фæзындзæн фылдæр куысты бынæттæ.
Ныртæккæ сыгъдæг кæнынц, дур кæцæй исдзысты, уыцы промышленнон фæз. Арæхдæр ахæм дурæй пайда кæнынц бæстыхæйтты æддаг бакаст аив кæнынæн. Фæлæ дзы архайæн ис æндæр хъуыддæгты дæр, зæгъынц специалисттæ. Ахæм цех фæнд кæнынц Æхсæрысæры дæр байгом кæнын.
Æрæфы районы сбæрæг кодтой экономикон рæзты зонæты дыууæ резиденты. Промышленнон проектæй дарддæр ма ам цырды уадзынц туристон проект дæр.
Æрæфы æмæ Алагиры районтæ снысан кодтой, куыд фыццаг муниципалон скондтæ, афтæ. Доныфарсы карьер æмæ Уыналы завод скусдзысты хæстæгдæр рæстæг. Республикæ сын цы гæнæнтæ сарæзта, уыдоны фæрцы хъалонтыл бирæ хардзгонд нæ цæудзæн, æмæ амалхъом адæм се фтиæгтæ хардз кæндзысты сæ архайд фæхъомысджындæр кæныныл.
