Ацы ногдзинад царды рауадзыны фадат фæци федералон проект «Нырыккон скъола» æмæ национ проект «Ахуырад» æххæстгæнгæйæ
Мызуры скъолайы бындурыл байгом уыдзæни нымæцон æмæ гуманитарон къабæзты центр «Точка роста». Ацы ногдзинад царды рауадзыны фадат фæци федералон проект «Нырыккон скъола» æмæ национ проект «Ахуырад» æххæстгæнгæйæ. Объекты цæттæдзинадмæ æркæсын кæныны тыххæй хæххон скъола бабæрæг кодта РЦИ-А ахуырад æмæ наукæйы министр Людмила Башарина. «Точка роста»-йæн цы кълæстæ радих кодтой, уыдон сцалцæг кодтой нырыккон домæнтæ хынцгæйæ. Центрты фирмæйы стильмæ гæсгæ сæ хæстæгдæр рæстæг ифтонг кæнын райдайдзысты кусæнгæрзтæй. Людмила Башаринæйы ныхæстæм гæсгæ, Мызуры скъолайы ахуырады хæрзхъæддзинад кæдфæндыдæр уыди раппæлинаг. Нымæцон æмæ гуманитарон къабæзты 17 центрæй иу ацы скъолайы байгом кæнын та уыдзæни æрмæст хорз ахуыр кæнынæн нæ, фæлæ алыхуызон олимпиадæты æмæ конкурсты архайынæн хорз фæрæз. Кълас цы нырыккон æрмæгæй ифтонг уыдзæни, уый фæрцы та гæнæн ис, æмæ сывæллæттæм раргом уа технологитæм, информатикæмæ æмæ æндæр предметтæм курдиат. Уымæй уæлдай, «Точка роста»-йы сæйраг урокты фæстæ цæудзысты уæлæмхасæн ахуырады программæмæ гæсгæ ахуыртæ. Зæгъын хъæуы уый, æмæ Мызуры скъолайы фæзындзæни робототехникæйы æмæ шахмæтты къордтæ дæр. Цæмæй, сывæллæттæ бынаты исой хæрзхъæд æмæ нырыккон ахуырад, уый тыххæй ахæм уаврæтæ хъæуты скъолаты сты æнæмæнг хъæугæ. Цæгат Ирыстоны ацы ногдзинад царды рауадзынæн федералон бюджетæй дихгонд æрцыди 26 милуан сомы. Уыцы æхцайæ балхæндзысты квадрокоптертæ, 3D принтертæ, интерактивон комплекстæ, 3D тренажертæ, компьютертæ. Æмæ нæдæр кусæнгæрзтæ. Уæ зæрдыл уын æй лæууын кæнæм, нымцон æмæ гуманитарон къабæзты центртæ байгом уыдзысты Æрыдоны æмæ Дыгуры районты фæйнæ иуы, Аланиры, Æрæфы, Кировы, æмæ Рахизфарсы районты дыгæйттæ, æртæ Мæздæджы районты, æмæ Горæтгæрон районы 4.
