Ерыс кодтой 4 командæйы: «Юность», «Барс», «Спартак-Алания», «Октябрьское»
Сывæллæтты æмæ фæсивæды спортивон скъола «Юность»-ы ацыди ирыстойнаг футболы ирддæр минæвæрттæй иу Нодар Папелишвилийы номарæн турнир. Ерыс кодтой 4 командæйы: «Юность», «Барс», «Спартак-Алания», «Октябрьское». Турниры уæлахиздзау сси командæ «Спартак-Алания», дыккаг бынат æрхауди «Юность»-мæ, æртыккæгтæ систы «Барс»-ы уæнгтæ. Трибунæты фæсивæды арæхстдзинадæн аргъ кодтой футболы ветерантæ. Мæскуыйæ сæрмагондæй ерыстæм стахтысты Нодар Папелишвилийы бинонтæ – йæ фырт æмæ йæ бинойнаг. Спортсментæн сластой лæвæрттæ – пуртитæ æмæ æндæр спортивон фæрæзтæ. Ирыстойнаг командæйы хуыздæр бомбардиры номарæн турнир фæнд кæнынц æрвылазон скæнын. Уæ зæрдыл уын æй лæууын кæнæм, Нодар Папелишвили нымад у Орджоникедзейы «Спартачы» хуыздæр футболисттæй иуыл. Йæ архайдæй, Дзæуджыхъæуы фæзындис спортивон скъола «Юность». Бирæ азты йын лæвæрдта разамынд, æмæ ныр хæссы зындгонд спортсмены ном.