Дзæуджыхъæуы Æхсæнадон Совет æмæ чырыстон дины хæрзауæдæн организацийы минæвæрттæ æххуысхъуаг æмæ бирæсывæллонджын бинонтæн уарынц кæрчытæ
Цæгат Ирыстоны дарддæр æххæстгонд цæуы акци «Горæт хъæуæн». Дзæуджыхъæуы Æхсæнадон Совет æмæ чырыстон дины хæрзауæдæн организацийы минæвæрттæ æххуысхъуаг æмæ бирæсывæллонджын бинонтæн уарынц кæрчытæ. Ногиры æмæ Архонкæйы цæрджытæ загътой куыд æхсызгон сын у ахæм лæвар райсын, уый.
Рамиз Алиевы йæ хорз хъуыддаджы тыххæй зоны æппæт республикæ. Нæлгоймаг баузæлд, Ленинграды блокадæ йæхиуыл чи банкъардта, æмæ абон æвæсæгæй чи баззад, ахæм сылгоймаг Александра Левченкойыл. Раздæры таксист ма сæрмагондæй йæ цæрæнуат Дзæуджыхъæуæй Æрхонкæмæ дæр раивта. Ам кæддæр царди сылгоймаг æмæ йын æхсызгон уыд йæ зонгæ бынæттæм раздæхын. Ныр Рамизы сæйраг хæс у ацæргæ сылгоймагæн æххуыс кæнын, ныууагъта йæ куыст, фæлæ уый хыгъд архайынц сæрмагонд проекты æмæ дарын райдыдтой кæрчытæ.
Проекты фæрцы баххуыс кодтой Тотраты Ирбегæн дæр. Нæлгоймаг у хæсты архайæг, йæ буар абон дæр рыст у тохы хъæдгæмттæй. Хæствæллад ветеранæн маргъ балхæдтой Стъараполы. Проектмæ гæсгæ 6 карчы æмæ иу уасæг байуардзысты 60 бинонтыл.
Акцийы «Горæт хъæуæн» архайынц Дзæуджыхъæуы администрацийы æмæ Æхсæнадон Советы уæнгтæ. Фыццаджыдæр æххуыс кæнынц фæкæсинаг æмæ бирæсывæллонджын бинонтæн.
Проекты аразджытæ зæгъынц, дарддæр æххуыс кæй цæудзæн. Нысан кæнынц 600 карчы байуарын.
