Æрæфы районы рæдау фæллойгæнджытимæ фембæлд не сфæлдыстадон къорд
Зæхкусджытæн сæ фæллой сисыны рæстæг ралæууыд. Быдыртæ æфснайд цæуынц, аграрон кусджытæ сæ тыллæгыл цин кæнынц, æмæ дзы хайджын кæнынц иннæты дæр. Æрæфы районы рæдау фæллойгæнджытимæ фембæлд не сфæлдыстадон къорд. Ныхасы бар Сосранты Жаннæйæн.
Цæгат Ирыстоны хъæууонхæдзарадон куыстытæ кæронмæ фæхæццæ кæнынц. Æрæфы районы дæр сæ бæркадæй сты разы. Ацы аз уæлдай хуыздæр æрзад нартхор. Ацы хатты хуызæн тыллæг никуы ма систой.
Уæвгæ ам быдыртæ æфснайынмæ бавнæлдтой октябры астæу. Ныридæгæн дæр ма куыст цæуы иуæй-иу хæдзарæдты фæзуæттæ æфснайыныл. Дарддæр зæхкусджытæ сæхи цæттæ кæндзысты тыллæг тауыны рæстæгмæ.
Нартхор ацы аз у хæрзхъæд. Зæхкусджытæй ацы культурæ чи байтыдта, уыдоны ныхæстæм гæсгæ, хорз бакодтой, æндæр исты кæй нæ ныссагътой сæ зæххытæл, уый. Ацы сæрд уыд æнæ къæвда æмæ нартхор хорз тыллæг радта.
Дзагуырты Ермачы Æрæфы районы цæрджытæ хорз зонынц. Æрвылаз йæ бæркадæй фæхайджын кæны хъæуты цæрджытæ дæр. Фермер куыд зæгъы, афтæмæй зæххы куыстæй тæрсын нæ хъæуы, стæй дæ райст тыллæгæй та хъуамæ зæрдиагæй дих кæнай иннæтимæ дæр.
Зæхкусæг азы алы афон дæр йæхицæн ссары куыст. Ныр дæр тыллæг æфснайыны куысты фæстæ сæм æнхъæлмæ кæсы ног хъуыддæгтæ. Æрæфы районы аграритæ райдыдытой иннæ сезонмæ сæхи цæттæ кынын. Хæссынц хуымгæндтæм хъацæнтæ. Ам куыд зæгъынц, афтæмæй та ногæй фæнд кæнынц сæ хуымгæндты фылдæр хайы нартхор байтауын.
