Разы не сты ног директоры хæслæвæрдтимæ æмæ ныффыстой курдиат сæ куыстæй сæ куыд суæгъд кæной, уый фæдыл
Ахуыргæнджыты æнæразыдзинад. Зæронд хъæуы астæуыккаг скъолайы 20 ахуыргæнæгæй 7 нæ рацыдысты куыстмæ. Разы не сты ног директоры хæслæвæрдтимæ æмæ ныффыстой курдиат сæ куыстæй сæ куыд суæгъд кæной, уый фæдыл. Сеппæт дæр сты райдиан кълæсты ахуыргæнджытæ. Ам ахуыр кæны 80 сывæллонæй фылдæр, уыдонæй бирæтæ сты 1-æмæй 4-æм кълæсты ахуырдзаутæ. Цæимæ не сты разы æмæ цы уынаффæ рахаста Рахизфарсырайоны разамынд уый равзарыныл бацархайдта Хаутаты Зитæ
Знон, 25 сентябры Зæронд Бæтæхъойыхъæуы астæуккаг скъолайы уроктæ цыдысты æрмæстдæр хистæр кълæсты. Райдиан кълæсты ахуыргæнджытæ куыстмæ нæ рацыдысты. Хъуыддаг равзырыны тыххæй не сфæлдыстадон къорд фембæлд Раизфарсы районы бынæттон администрацийы ахуырады управленийы минæвар Цъæхилты Олегимæ.
Дзиуаты Мадинæ скъолайы директорæй нысангонд æрцыд ацы аз сæрды. Йæ хъуыдымæ гæсгæ, ахуыргæнджытимæ кæрæдзийы бамбæрстой æнæкъуылымпыйæ, уымæ гæсгæ, æнхъæл нæ уыди ахуыргæнджытæ ахæм фæндон кæй рахæсдзысты, уый.
Скъолайы райдиан кълæсты ахуыргæнджытæй никæйы ссардтам. Архайдтам дзы искæмæ телефонæй бадзурыныл дæр, фæлæ хъыгагæн уый дæр нæ къухы нæ бафтыд. Рахизфарсы районы администрацийы сæргълæууæг Беркъаты Константин куыд загъта, уымæ гæсгæ скъолайы ахуырадон процесс бауыромын хъуыддаг не руаддзæн. Ахуыргæнджытæй йæ куысты бынат суæгъд кæныны тыххæй курдиат чи балæвæрдта, уыдонæй сæ иуæн дæр нæ бафыстой.
