Конкурс «Ирыстоны сывæллæттæ» нæ республикæйы фыццаг хатт арæзт нæ цæуынц.
Республикæйы аивæдты лицейы абон схорзæхджын кодтой сывæллæтты сфæлдыстадон конкурсы уæлахиздзауты. Конкурс «Ирыстоны сывæллæттæ» нæ республикæйы фыццаг хатт арæзт нæ цæуынц.
Ацы аз æй сарæзтой Хетæгкаты Къостайы сæдæ æхсай азы кадæн. Сфæлдыстадон ерысты архайдта сæдæ дыууын адæймаджы Ирыстоны алы рæттæй. Конкурсмæ хаст æрцыдысты æрыгон нывгæнджыты сæдæ хуыздæр куысты. Се хсæн аивæдты лицейы ахуырдзаутæ дæр. Жюрийы уæнгтæ уыдысты нæ республикæйы сгуыхт нывгæнджытæ – Челæхсаты Магрез, Басаты Олег, Мæргъиты Таймураз æмæ Есенаты Æхсар. Абон сæ æрбахуыдтой сæ бæрæгбонмæ æмæ сарæзтой зæрдæмæдзæугæ мадзал. Сывæллæттæ бакастысты Къостайы æмдзæвгæтæ, сæвæрдтой сценкæтæ. Музыкалон кълæсты ахуырдзаутæ та рагон инструменттыл ацагътой уацмыс «Хъуыбады». Уазджытæн радзырдтой Къостайы цард æмæ сфæлдыстады тыххæй. Сарæзтой конкурсон куыстыты равдыст дæр. Бæрæгбонæн æвдисæн уыдысты Хетæгкаты Къостайы премийы лауреаттæ æмæ республикæйы культурæйы министр Къубалты Эльбрус.
