Цыди Архангельскы.
Ирыстойнаг фæндырдзæгъдджытæ уæлахиздзаутæ систы Сергей Сметанины номыл Æппæтуæрæсеон конкурсы уæлахиздзаутæ. Цыди Архангельскы. Фæндырдзæгъдджыты къорд «Ирыстон» хъахъхъæдта нæ республикæйы культурæйы колледжы кад. Адæмон хайады студенттæ Плиты Ацæмæз, Тауытты Виталий æмæ Икъаты Давид фæндаг ссардтой аивадуарзджыты зæрдæтæм. «Ансамбльты» номинацийы музыканттæ ацагътой ирыстойнаг композиторты уацмыстæ, æмæ бацахстой фыццаг бынат. Уымæй дарддæр ма Архангельскы аивæдты колледжы уырыссаг адæмон интсрументты оркестримæ ацагътой Сергей Сметанины композици. Уый уыд конкурсы æнæмæнг домæн. Конкурсы ма архайдтой Хъырымы, Белоруссийы, Мордовийы, Воронежы, Волгограды æмæ Саратовы облæстты, стæй Тулæйы, Санкт-Петербурджы æмæ Мæскуыйы минæвæрттæ. Æппæтадæмон фестиваль Архангельскы облæсты арæзт цæуы 2006-æм азæй фæстæмæ. Баст у курдиатджын музыкант æмæ композитор, бирæ æппæтадæмон конкурсты лауреат Сергей Сметанины номимæ. Канд фæндырæй цæгъдынмæ нæ арæхсти хорз. Иттæг хорз ма хæдзары алыхуызон дзаумæттæй, зæгъæн ис, æмæ арæзта музыкалон инструменттæ дæр. Цæгатаг фольклорæй пайда кæнгæйæ ма ныффыста дæсгай уацмысы фæндырæн.
