27-æм скъолайы кусæг Къораты Жаннæ сси гран-при «Æвзист сис»-ы хицау. Номинаци «Дæсны ахуыргæнæджы» та рамбылдта скъола «Диалогы» ахуыргæнæг Кочиты Тамарæ
Хуыздæртæй хуыздæртæ. Дзæуджыхъæуы ирон æвзаг æмæ литературæйы ахуыргæнджытæ Æппæтуæрæсеон конкурсы систы уæлахиздзаутæ. 27-æм скъолайы кусæг Къораты Жаннæ сси гран-при «Æвзист сис»-ы хицау. Номинаци «Дæсны ахуыргæнæджы» та рамбылдта скъола «Диалогы» ахуыргæнæг Кочиты Тамарæ. Куыд цæттæ кодтой сæхи ацы ерыстæм, уый тыххæй радзурдзæн Хæуытаты Зитæ.
Тагьд рæстæджы Дзæуджыхъæуы цæудзæн фестиваль «Дзæуджыхъæу – нæ иумæйаг хæдзар». Ирон æвзаг æмæ литературæйы ахуыргæнджытæ сæхи цæттæ кæнынц конкурстæм. Къораты Жаннæ у советы сæйраг архайæг. Кæд æрыгон у, уæддæр у фæлтæрдджын. Æрæджы Жаннæ райста УФ-йы Президенты цур арæзт Уæрæсейы хъæууонхæдзарадон академиийы конкурсы гран-при. Уымæй уæлдай сси уæлахиздзау, лæвар ын æрцыд «Æвзист сис». Схорзæхджын ма йæ кодтой сæрмагонд сертификатæй. Уый йын фадат ратдзæн сæрмагонд ахуырад райсынæн.
Жаннæ йæхæдæг куыд зæгъы, уымæ гæсгæ, уæлахиз йæ къухы æнцонæй нæ бафтыд. 400 -йæ æвзæрст æрцыд 40 архайæджы. Уыдон конкурсмæ хуынд æрцыдысты Мæскуымæ. Нæ хæс уыд лæмбынæг урок ныффыссын, йемæ баст методикон æрмæгыл бакусын, фембæлды ирон æвзаджы фарстатыл лæмбынæг æрныхас кæнын. Нæ сæрмагонд хæс уыди – национ дарæсы социалон æмæ ритуалон ахадындзинад равдисын. Сылгоймаджы национ дарæсæн та йæ иу хай у – цыллæ быд кæлмæрзæн. Жаннæ та ацы æрмдæсныйадмæ хорз арæхсы. Уымæ гæсгæ йæ къухы æнæ къуылымпыйæ бафтыд.
Жаннæйы мкусджытæ йæ уæлахизыл дызæрдыг нæ кодтой. Тынг зæрдиагæй йæм æнхъæлмæ кастысты.
Кочиты Тамарæ та ацы конкурсы уæлахиздзау сси номинаци «Учитель-мастер»-ы. Куыд зæгъы, афтæмæй, курдиатæй уæлдай ма адæймаг хъуамæ уарза йæ куыст. Хорз ахуыргæнæджы йæ ахуырдзаутæ хъуамæ æмбарой æрдæг ныхасæй. Хъуамæ ахуыргæнæг ссара фæндаг алы ахуырдзаумæ дæр.
Фæйнæджы раз хицæн къордимæ куыст. Ам сæйраг у бамбарын, цавæр ахастдзинæдтæ ис алы сывæллонмæ дæр, уый. Уымæй аразгæ у педагогы дарддæры куыст. Уæд ахуыргæнæгæн ахуырдзаутæ дæр аргъ кæнынц.
Ууыл дæр нæ уæлахиздзау æрлæуынмæ нæ хъавы. Ног бæрзæндтæм размæ кæндзæн уæндон æмæ ахадгæ къахдзæфтæ.
