Дыгургомы цалдæр хъæуы Æхсæу, Зæдæлеск, Дзинага æмæ Стыр-Дыгуры скъоладзаутæн æндæр гæнæн нæй, æмæ сæ ахуыры бынатмæ Мацутæмæ цæуынц фистæгæй, кæнæ та ууылты цæуæг машинæтыл
Дыгургомы цалдæр хъæуы Æхсæу, Зæдæлеск, Дзинага æмæ Стыр-Дыгуры скъоладзаутæн æндæр гæнæн нæй, æмæ сæ ахуыры бынатмæ Мацутæмæ цæуынц фистæгæй, кæнæ та ууылты цæуæг машинæтыл. Республикæйы физикон-математикæйы лицей-интернаты филиалы сæхи автобус ис, фæлæ ацы азы сентябрæй лæууы æгуыстæй. Æмæ уый сæ иунæг лыггæнинаг фарста нæу. Цæмæй ма тыхсынц хохаг адæм, уый тыххæй радзурдзæн Касаты Наирæ.
Скъолайы кæрты ног автобус. Ифтонг у æппæт хъæугæ фæрæзтæй, сывæллæтты ласынæн. Æххæстгонд дзы сты сабитæн æнцонархайд æмæ æдасдзинады домæнтæ. Транспорты дæгъæлтæ кадджын уавæры радтой сентябры. Фæлæ автобус бирæ рæстæг нæ цыди. Ныртæккæ лæууы кæрты, зæгъынц ныййарджытæ. Сывæллæттæн сæ фылдæр хай ам æрмæст ахуыр нæ кæнынц, фæлæ къуырисæрæй сабатмæ цæргæ дæр. Сæ фæндаг цыбыр нæу. Цæуын сæ хъæуы 10-гай километртæ. Ахуыргæнæндонæн ис интернаты статус.
Ныййарджытæй бирæтæ зæгъынц, сæхæдæг дæр кæддæр ам кæй ахуыр кодтой, уый. Фæлæ дзы ахæм къуылымпыдзинæдтыл никуы æмбæлдысты. Сæ ныхæстæм гæсгæ сæ кæдфæндыдæр ластой скъоламæ, къуырийы кæрон та иу сæ фæстæмæ сæмбæлын кодтой сæ хæдзæрттыл. Ныр та сывæллæттæй иуæй-иуты скъоламæ бахæццæ уæвын бахъæуы уыцы фæндагыл цæуæг машинæтыл. Кæнæ та таксийæ. Уымæн æхца кæмæн нæй, уыдонæн та сæ фæндаг иу — фистæгæй. Хъуыддаг æмбæрстгонд у — уый адас кæй нæу, уый. Ныртæккæ æрталынг вæййы, æмæ хæхты тæссаг у хъæддаг сырдтæй дæр.
Интернаты разамонæг ам кусы 20 азæй фылдæр. Йæ ныхæстæм гæсгæ, ахæм хъуыддагимæ сæмбæлыдысты фыццаг хатт. Йæ аххосаг у, Уæрæсейы закъонæвæрынады ивддзинæдтæ кæй æрцыди, уый. Ныр сывæллæтты ласынæн хъæуы лицензи исын. Уый размæ та æрзилын хъæуы бирæ бæрнон кустуæттыл, стæй бафидын хъæуы 50 мин сомы. Сæвзæрд уавæр аиуварс кæнын районы æнцон нæу. Уый нæ хынцгæйæ, документтæ бацæттæ кодтой, æмæ къуырийы кæронмæ сывæллæтты ласыны фæтк хъуамæ сног уа.
Ахуыргæнджыты чи тыхсын кæны, ноджыдæр ма иу ахæм фарста. Куысты мызд кæй фæкъаддæр ис, уый. Ахуыргæнджытæй иутæ зæгъынц, æрæджыйæ фæстæмæ дыууæ хатты къаддæр исын кæй райдыдтой, уый.
Фарстайыл æрдзырдтой физикон-математикон лицейы дæр. Уымæн æмæ 10 азы Мацутæйы скъола ис республикон ахуыргæнæндоны бæрны. Йæ разамынды ныхæстæм гæсгæ, хъæуы скъолайы ахуыргæнджыты фиддонтæ иууылдæр цæуынц, Уæрæсейы фидаргонд чи у, ахæм нормативон акттæм гæсгæ.
Уыцы рæстæг лицейы зæгъынц, хъаст сæм кæй ничи æрбахаста, уый. Фæлæ уæддæр, ахуыргæнджыты хъуыдытæ хынцгæйæ курдиат бахæсдзысты ахуырад æмæ наукæйы министрадмæ, цæмæй уым фарста алыг кæной, уый тыххæй.
