Суинаг программисттæ цы зонындзинæдтæ исынц, уыдон сын фадат ратдзысты цымыдисаг проекттæ аразынæн, уыимæ виртуалон дунемæ æххæстæй хизын нæ хъæудзæн
Фидæнмæ къахдзæф. 150 скъоладзауы нæ республикæйы алы районтæй æмæ Хуссар Ирыстонæй ныртæккæ ахуыр кæнынц зымæгон нымæцон скъолайы. Суинаг программисттæ цы зонындзинæдтæ исынц, уыдон сын фадат ратдзысты цымыдисаг проекттæ аразынæн, уыимæ виртуалон дунемæ æххæстæй хизын нæ хъæудзæн. Ахуырадон программæйы стыр æргом здæхт цæуы уымæ, цæмæй лæппутæ æмæ чызджытæ сахуыр уой иу командæйы кусыныл.
30 секунды ахъуыды кæнынæн, æмæ дзуапп цæттæ. Ам сæйрагдæр у командæйы куыст. Софт-скилс нымæцон скъолайы у æнæмæнг хъæугæ элемент. Фæсивæд ахуырты рæстæг бакусынц кæронбæттæны кæй бахъахъхъæндзысты, ахæм проекттыл. Ахуыртæ цæуынц Дзæуджыхъæуы 28-æм скъолайы бындурыл.
Республикæйы зымæгон нымæцон скъола скæныны грант рамбылдта Цæгат Ирыстоны университет. Национ программæ «Нымæцон экономикæ»-йыл бакуыстой Уæрæсейы рухстауæн минстрады. Нæ регионæн у æртыккаг къæпхæн. Амæй размæ сæрдыгон скъола цыди Кванториумы. Азамат æмæ Артур архайынц иу командæйы. Ныртæккæ кусынц иумæйаг проектыл, æххуыс уыдзæни алы къабæзты бæрæггæнæнтæ бахъахъхъæнынæн, уыимæ бизнесы дæр. Бæрæггæнæнтæ уникалон коды фæрцы æмбæхсыны хъуыды ног нæу. Фæлæ æвзонг ахуыргæндтæм ис сæхи системæ. Æрхъуыды йæ кодтой зымæгон нымæцон скъолайы ахуыргæнгæйæ.
Федералон проект «Нымæцон экономикæйы кадрты» архайынц 150 адæймаджы. Уыдон сты 12 азæй 18 азы онг кæуыл цæуы, ахæмтæ. Рæзгæ фæлтæры равзæрстой республикæйы æппæт скъолатæй. Æртæ сæйраг къабазмæ бахаудтой хуыздæртæ. 22 скъоладзауы сты Хуссар Ирыстонæй. Бацæттæ ма сын кодтой культурон программæ дæр. Зæгъын хъæуы уый, æмæ ахæм проектты фыццаг хатт нæ архайынц. Сæрды та уыдысты Кванториумы.
Фæсивæдæн ахуыртæ амонынц ЦИПУ-йы математикон факультеты ахуыргæнджытæ. Фæлæ дзы ис, зæгъæм, хæххон металлургон институтæй дæр. Уымæй уæлдай дзы фембæлдтытæ уыди бизнесы минæвæрттимæ дæр. 10 бонмæ æвзонг ахуыргæндты базонгæ кæндзысты нымæцон экономикæйы цымыдисаг фæзилæнтимæ.
Скъолайы ахуыртæ цæуынц райсомæй фæссихормæ. Ам рæзгæ фæлтæры ифтонг кæнынц хæринагæй дæр. Университетæн у фыццаг ахæм проект. 12-æм январы скæндзысты кæронбæттæн хатдзæгтæ. Хуыздæр проектты автортæ æрцæудзысты хорзæхгонд. Кæмæндæрты та фæзындзæн сæ гæнæнтæй царды спайда кæныны фадат.
