Арфдæр сахуыр кæнын ис бæлвырд предмет æмæ ма суанг базонгæ уæвын фидæны дæсныйадимæ дæр
Раргом кæнын курдиат, æмæ йæ рæзтыл кусын. Профилон кълæсты ахуырад æрмæст уымæ арæзт нæу. Арфдæр сахуыр кæнын ис бæлвырд предмет æмæ ма суанг базонгæ уæвын фидæны дæсныйадимæ дæр. Цавæр уæлæмхасæн гæнæнтæ ма дæттынц сæрмагонд кълæсты, уый тыххæй радзурдзæн Хъайтмазты Дзерассæ.
Скъолайы уæлæмхасæн ахуырады нырыккон гæнæнтæй ахадгæйæ пайда кæнынц, сывæллæтты æмæ фæсивæды курдиæттæ æргом кæныны, æххуыс сын кæныны республикон центр «Вершина»-йы. Сæрмагонд кабинеттæ æххæстгонд сты æппæт хъæугæ кусæнгæрзтæй æрдзон наукæтæ ахуыр кæнынæн. Центры кусы 6 тематикон лабораторийы. Скъоладзаутæн ис, физикæ, хими, биологи, инженерон-техникон сфæлдыстад, математикæ æмæ информатикæ арфдæр ахуыр кæныны фадат. Цæмæй ахуырдзаутæ уæлæмхасæн уроктæм цæуой, уый тыххæй ахуыргæнæндонæн йæ бон у, центримæ бадзырд бафыссын. «Вершина»-йы директор Вардашаты Зæлинæ куыд загъта, афтæмæй ахæм фадат ис профессионалон техникон училищæтæн дæр.
Центры ис психологон æххуысы кабинет дæр. Рæзгæ фæлтæримæ ныхас кæнынц, аразынц сын дæсныйадæвдисæг ахуыртæ.
Скъоладзауты базонгæ кæнын фидæны дæсныйадтимæ æмæ сæ хуыздæр бацæттæ кæнын фæлварæнтæм – уый у профилон кълæсты сæйраг нысан. Сывæллæттæн ахуыртæ аразынц медицинон колледжы дæр. Лекциты фæстæ практикон ахуыртæ. Педагогты ныхæстæм гæсгæ, афтæмæй æрмæг хуыздæр æмбарынц.
Профилон кълæстæ архайынц алыхуызон скъолаты бындурыл дæр. Гимназ «Диалог»-ы слестгæнæн комитеты кадетон кълас фарон байгом кодтой. Республикæйы æдæппæтæй сты 4. Сывæллæттæн дзы бацæттæ кодтой сæрмагонд программæ. . Хуымæтæг предметтæй уæлдай ма кадеттæн слестгæнæн комитеты кусджытæ кæсынц сæрмагонд курс. Профилон ахуыртæ сын кæнынц криминалистикæйæ, æхсæн æмæ хæстрæнхъон цæттæдзинадæй.
Æрæджы Мæскуыйы уыд 7-æм æхсæнадæмон хæрзаудæн кадетон бал. Архайдтой дзы бæстæйы 74 субъектæй сывæллæттæ. Республикæйæ дзы уыдысты гимназ «Диалог»-ы æмæ Алагиры дыккæгæм скъолайы кадеттæ. «Диалог»-ы директор Икъаты Бэлæ куыд загъта, афтæмæй Цæгат Ирыстоны кадеттæ ахæм стыр мадзалы фыццаг хатт архайдтой.
Профилон кълæстæ скъоладзаутæн дæттынц, алыхуызон предметтæ арфдæр ахуыр кæныны фадат. Республикæйы ныридæгæн ис 115 сæрмагонд къласы.
