Сæ тыхтæ æвзарынц архайджытæ бæстæйы 61 регионæй
Цæгат Ирыстоны цæуы «Профессионалты» чемпионаты хатдзæгтæгæнæн къæпхæн. Сæ тыхтæ æвзарынц архайджытæ бæстæйы 61 регионæй. Экспертты хъæуы 5 къабазмæ гæсгæ хуыздæрты равзарын – «Сити-фермерство»-йы, «Агуыридур æвæрын»-ы, «Хъæддæсныйы æмæ пецгæнæджы хъуыддаджы», стæй «Ирон чъиритæ фыцын»-ы. Бæлвырддæр хабæрттæ радзурдзæн Хъайтмазты Дзерассæ.
Андрей Ремейников у Пермы арæзтадон колледжы студент. Цæгат Ирыстонмæ лæппу ссыд, профессионалон дæсныйады чемпионаты йæ тыхтæ бавзарынмæ. Мадзалы архайы дыккаг хатт.
Цæгат Кавказы аграрон-технологон колледжмæ чемпионат «Профессионалтæм» ссыдысты архайджытæ бæстæйы 61 регионæй. Республикæйы цæуы ерысты хатдзæгтæгæнæн къæпхæн. «Агуыридур æвæрын»-ы компетенцийы сæйраг категорийы сæ тыхтæ æвзарынц 50 архайæджы онг æмæ 11 юниоры.
Чемпионатон змæлды мадзæлттæ æххæстгонд цæуынц 2023-æм азæй фæстæмæ. Сæ нысан у фæсивæдæн æххуыс æмæ Уæрæсейы фидæны специалистты æмвæзады райрæзтыл кусын. Цориты Давид у скъоладзау. Чемпионаты дыккаг аз архайы, æвдисы иттæг хорз бæрæггæнæнтæ. Йæ фидæн Давид хъæддæсныйы хъуыддагимæ сбæттын нæ фæнд кæны, фæлæ йæ нымайы хорз хоббийыл.
Сæйраг кары категорийы экспертты хъæуы хуыздæрты равзарын «Сити-фермерство»-йы, «Агуыридур æвæрын»-ы, «Хъæддæсныйы æмæ пецгæнæджы хъуыддаджы стæй «Ирон чъиритæ фыцын»-ы компетенциты. Уыдонæн аргъ кæныны тыххæй, уал эксперттæ фыццаг сæхæдæг сахуыр кодтой чъиритæ цæттæ кæнын, райстой сертификаттæ.
Ерысты архайынц, 14 азæй фылдæр кæуыл цæуы, ахæм скъоладзаутæ æмæ астæуккаг ахуыргæнæндæтты студенттæ. Хатдзæгтæ сбæрæг уыдзысты 13-æм июны. Жюри хуыздæрты сбæрæг кæндзæн сæйраг категорийы æмæ юниорты хсæн. Мадзал аразджыты фидарæй уырны, чемпионат «Профессионалтæ» фæбæрзонддæр кæндзæн астæуккаг ахуырады кад.
