Архайдтой дзы министрадты æмæ ведомствоты разамонджытæ, муниципалон скондты æмæ районты администрациты сæргълæуджытæ
Ног ахуыры азмæ цæттæдзинады фарстатыл æмбырд арæзт æрцыд Хицауады сæрдар Дзанайты Барисы разамындæй. Архайдтой дзы министрадты æмæ ведомствоты разамонджытæ, муниципалон скондты æмæ районты администрациты сæргълæуджытæ. Премьер куыд загъта, афтæмæй Цæгат Ирыстон активонæй архайы паддзахадон программæ «Ахуырады рæзт»-ы. Уый фæрцы дыууæ азмæ бындуронæй сцалцæг кодтой 66 скъолайы. Алы ахуыргæнæдоны дæр сног кодтой материалон-техникон бындур, сцалцæг кодтой хæринаггæнæн блок. Ацы аз бындуронæй цалцæг кæнынц 26 скъолайы. Се хсæн 6 иуазон æмæ 20 цæугæ объекты. Республикæйы разамонæг Сергей Меняйлойы амындмæ гæсгæ цæуы егъау куыст. Сæйрагдæр хæс у хæрзхъæд ахуырад æмæ сывæллæтты æдасдзинадыл архайын, – загъта Дзанайты Барис. Бæстон доклад скодта ахуырады æмæ наукæйы министр Алыбекты Эллæ. Национ проект «Ахуырад»-мæ гæсгæ Цæгат Ирыстоны арæзт æрцæудзæн 13 «Точка роста»-йы, 2 ног «Кванториумы» æмæ 1 «IT клуб». Уымæй дарддæр сентябры скъоладзаутæ райдайдзысты æнæпилотон авиацион системæ ахуыр кæнын. Проекты архайынц 18 скъолайы республикæйы æппæт районтæй. Йæ центр та уыдзæн Цæгат Кавказы аграрон технологон колледжы. Сног кæндзысты хъæуккаг скъолаты спортивон залтæ дæр. Æмтгæй райсгæйæ, федералон программæмæ гæсгæ сцалцæг кодтой 40 объекты.
