Горæтаг скъолаты хсæн хуыздæрыл нымад æрцыд республикæйы физикон-математикон лицей-интернат, хъæуккаг ахуыргæнæндæтты хсæн та – Архонкæйы 1-æм скъола
Цæгат Ирыстоны 60 скъолайы райсдзысты республикæйы сæргълæууæджы гранттæ. Æвзæрст æрцыдысты, сæ архайдæн сын алыхуызон домæнтæм гæсгæ аргъ кæнгæйæ. Горæтаг скъолаты хсæн хуыздæрыл нымад æрцыд республикæйы физикон-математикон лицей-интернат, хъæуккаг ахуыргæнæндæтты хсæн та – Архонкæйы 1-æм скъола. Бæлвырддæр радзурдзæн Хъайтмазты Дзерассæ.
Æрвылбоны бæлвырд куыст æмæ куыд хатдзæг – иттæг хорз бæрæггæнæнтæ ахуыры. Икъаты Сæрмæт у республикон физикон-математикон лицей-интернаты 10-æм къласы ахуырдзау. Ивгъуыд ахуыры азы радта 4 хатдзæгтæгæнæн фæлварæны, æмæ алкæцыйæ дæр райста 5. Фидæны дæсныйад Сæрмæт нырма нæ равзæрста, фæлæ æнæмæнг баст уыдзæн бæлвырд наукæтимæ.
Сæрмæты иттæг хорз бæрæггæнæнтæ дæр баххуыс кодтой лицей-интернатæн Цæгат Ирыстоны сæргълæууæджы грант райсын. Паддзахадон хатдзæгтæгæнæн аттестацийы бæрæггæнæнтæ, скъоладзауты архайд олимпиадæты, спортивон æнтыстдзинæдтæ. Уыдон сты, скъолаты ахадгæ куыстæн аргъ кæныны критериты æрмæст иу хай. Алы пунктмæ гæсгæ дæр ацы ахуыргæнæндонæн ис бæрзонд бæрæггæнæнтæ. Цæгат Ирыстоны сæргълæууæджы грант райсынæн цы баллтæ сæмбырд кодта, уымæ гæсгæ лицей-интернат фыццаг бынат бацахста горæтаг скъолаты *хсæн.
Хъæуккаг скъолаты *хсæн хуыздæр сси Архонкæйы фыццæгæм скъола. Стыр æвæрæн ацы уæлахизмæ бахастой кадеттæ. Ивгъуыд ахуыры азы хорз бæрæггæнæнтæ равдыстой æфсæддон-спортивон хъазт «Зарница»-йы.
Фарон ацы скъола уыд æртыккаг бынаты. Афæдзмæ йæ бæрæггæнæнтæ фæхуыздæр кодта, æмæ ныр ис, грант кæмæн æмбæлы, уыцы номхыгъды сæргъы.
Цæгат Ирыстоны сæргълæууæджы гранттæ нысангонд æрцыдысты фарон. Сæ бæрц нымад цæуы, скъолатæ цал баллы сæмбырд кæной, уымæ гæсгæ. Фæрæзтæ хардз кæнынц ахуыргæнджытæн премитæн. 2023-æм-2024-æм ахуырадон азы хатдзæгтæм гæсгæ гранттæ райсдзысты республикæйы 60 скъолайы – 30 горæтаг æмæ 30 хъæуккаг ахуыргæнæндоны. Иумæйаг фонды бæрц у 60 милуан сомы.
