Театралон аивады паддазхадон институты ирон студийы рауагъдон, æнусы рдæгæй фылдæр æнæзæрдæхудтæй лæггад кодта ирон аивад æмæ культурæйæн
Йæ цардæй ахицæн Уæрæсейы Федерацийы сгуыхт артист, Цæгат Ирыстоны адæмон артист Суанты Хъазыбег. Театралон аивады паддазхадон институты ирон студийы рауагъдон, æнусы рдæгæй фылдæр æнæзæрдæхудтæй лæггад кодта ирон аивад æмæ культурæйæн. Йæ къухы бафтыд бирæ ирд сурæттæ саразын. Уыдонимæ Дзантемыры роль спектакль «Усгурты», Хуындæг – «Софьяйы зарæджы», Майрæмы фæлгонц «Долæты чындзæхсæвы» æмæ афтæ дарддæр. Ирыстоны адæм æй зыдтой, куыд курдиатджын зарæггæнæг, афтæ дæр. Суанты Хъазыбег у, ирон театры сценæмæ 70-йæм азты чи æрбацыди, уыцы фæлтæрæй. Алы кары аивадуарзджытæн дæр уыди уарзон актер. Алы ирон адæймаджы зæрдæйы дæр Хъазыбеджы сфæлдыстад ахсы арф бынат. Уæлдай тынгдæр адæм бауарзтой Мыстулаты Иринæйы æмæ Цæгæраты Гигойы ныхæстыл фыст зарæг. Аивадуарзджыты размæ йæ рахастой Суанты дыууæ æфсымæры, Ким æмæ Хъазыбег. Сæ дыууæйы рацыд дæр-иу сценæмæ уыди æнæхъæн цау. Уæвгæ, Суанты бинонты зарыдысты иууылдæр: фыд, мад æмæ сæ хистæр æфсымæр дæр. Хъазыбеджы кæддæр чидæр фарста, никуы фæфæсмон кодтай, дæ цард ирон театримæ кæй сбастай, ууыл зæгъгæ, уый сын радта ахæм дзуапп – æнæ театр цæргæ дæр нæ кодтаин. Алы драмон актер дæр, цæмæй театрдзауы ргом раздаха, уый тыххæй хъуамæ хайджын уа вокалон курдиатæй дæр. Хъазыбег та уымæй уыди æххæст. Йæхæдæг куыд дзырдта, афтæмæй театр уыд йæ фыццаг хæдзар, æмæ дзы арвыста йæ царды фылдæр хай. Уыди æгæрон курдиаты хицау, зæрдæхæлар адæймаг, цæстуарзон æмкусæг. Йæ фæстаг фæндагыл æй арвитдзысты абн Ирон театрæй. Суанты Хъазыбегыл цыдис 78 азы…
