Хъæуы культурæйы хæдзар цалцæггонд æрцыд национ проект «Культурæ» æххæстгæнгæйæ
Хæзныдоны сывæллæттæн ныр секцитæм цæуын у æнцондæр æмæ цымыдисагдæр. Хъæуы культурæйы хæдзар цалцæггонд æрцыд национ проект «Культурæ» æххæстгæнгæйæ. Сног кодтой зал, балхæдтой хъæддзаума æмæ техникон фæрæзтæ. Ныр ардæм цæуынц 50 сывæллоны. Уыдон арæх саразынц концерттæ – равдисынц цæуыл ахуыр кæнынц культурæйы хæдзары, уый. Бæлвырддæр радзурдзæн Чехойты Фатимæ.
Фæданты Аделинæ æмæ Ортабайты Салимæ цæуынц вокалон къордмæ. Кæд хæрзæрыгæттæ сты, уæддæр иу мæ дыууæ хатты нæ архайдтой районы æмæ республикæйы конкурсты. Бафæзминаг ансамбль «Хæзныдон»-имæ сæ дæсныйад æвдыстой æппæтуæрæсеон туристон æмбырд гом кæныны кадджын мадзалы дæр. Чызджытæ куыд зæгъынц, уымæ гæсгæ ноггонд культурæйы хæдзары уавæртæ кæй фæхуыздæр сты, уый фæрцы уырдæм æхсызгондæрæй цæуынц.
Ныр культурæйы хæдзары ис ног фæрæзтæ зарæггæнджыты къордæн. Йæ разамонæг Геккиты Светланæ куыд загъта, уымæ гæсгæ сывæллæттимæ кусын сси æнцондæр. Ног микрофонтæ æмæ аудиосистемæйæ уæлдай ма сæм фæзынд проектор дæр. Уый руаджы къорды архайджытæ иуфарсæй бакæсынц сæхимæ æмæ тагъддæр сраст кæнынц сæ хъæндзинæдтæ.
2021-æм азы æрцыд цалцæггонд культурæйы хæдзар. Баивтой йын йæ сæр, рацарæзтой йын йæ алыварс территори, сцацæг кодтой æппæт агъуыстытæ дæр. Залы сæвæрдтой ног бандæттæ, æрцауыгътой дзы рæсугъд сценæйы æмбæрзæнтæ. Фæзынд дзы дзаумæттæласæн бынæттæ æмæ санузел. Ц алцæггæнæн куыстыты рæстæг сфæлдыстадон къордтæ куыстой хъæуы сывæллæтты рæвдауæндоны, бафæзминаг ансамбль «Хæзныдон» та йæ репетицитæ кодта скъолайы спортивон залы. Ныр æрыгон кафджыты бар у ноггонд сценæ. Культурæйы хæдзар та йæхæдæг сси хъæуы цæрджыты уарзондæр бынат.
Культурæйы хæдзары архайынц 50 сывæллоны. Уыдонæн ис фадат кафынæн æмæ зарынæн, доулийæ цæгъдынæн æмæ быйын ахуыр кæнынæн, цæуынц поэтикон æмæ драмон къордтæм.
Культурæйы хæдзар цалцæггонд æрцыд национ проект «Культурæ» æххæстгæнгæйæ. Уый царды уагъд цæуы 2019 азæй Уæрæсейы президенты уынаффæмæ гæсгæ.
