Ныртæккæ дзы реставратортæ сног кодтой галерейæ, сцалцæг кодтой бæстыхайы æддаг бакаст, базылдысты рудзгуытæм, радиаторон хызæгтæм æмæ æндæр хъуыддæгтæм
Егъау рацарæзт. Тугъанты Махарбеджы номыл аивадон музей хъуыстгонд у канд йæ коллекцийæ нæ, фæлæ ма йæ бæстыхайæ дæр. Ныртæккæ дзы реставратортæ сног кодтой галерейæ, сцалцæг кодтой бæстыхайы æддаг бакаст, базылдысты рудзгуытæм, радиаторон хызæгтæм æмæ æндæр хъуыддæгтæм. Национ проект «Культурæ»-æм гæсгæ музейæн радих кæндзысты 4 милуаны æмæ 800 мин сомы. Куыд сæ спайда кæныдзысты, уый тыххæй радзурдзæн Чехойты Фатимæ.
Дзæуджыхъæуы хæзнатæй иу – Йæ раззаг къул Зодиакы нысантæ æмæ сылгоймаджы гуырыконды скульптурæтæй фæлыст бæстыхай. Тугъанаты Махарбеджы номыл музей зындгонд у æрмæст йæ экспонаттæй нæ, фæлæ цы хæдзары æрбынат кодта, уымæй дæр.
Бирæ рæстæг галереямæ, кæнæ Зымæгон цæхæрадонмæ бацæуæн нæ уыд. Дыууæ азы размæ меценаты æххуысæй специалисттæ базылдысты фонтанмæ. Туфæй, зынаргъ авгæй æмæ денджызон стæм дурæй конд кæй у, уымæ гæсгæ йæхимæ лвасы цæстæнгас. Реставратортæ сног кодтой галерея. Йæ къултæй йын иу сцæлцæг кодтой. Реставрацигонд æрцыдысты рудзгуытæ æмæ радиаторты æхгæнæнтæ – дзырдæн зæгъгæйæ, Дзæуджыхъæуы æппæты разæй ацы хæдзары фæзынд хъармгæнæн системæ.
Огановы хæдзары залтæ аивгонд сты хицæн æууæлтæм гæсгæ. Арæхстджынæй сæ баиу кодта Генрих Клузачек – мидæгæй фыстытæ чи кодта, уый. Залтæй иутæ æхгæд сты – реставрацигонд агъуыстыты æвæрд сты коллекцийы дзауматæ.
Ам сæрмагонд бынат ахсынц бæстæйы сæйраг музейты лæвæрттæй арæзт уырыссаг аивады коллекци æмæ, абарæн æндæр истæимæ кæмæн нæй, ирон аивады уыцы æмбырдгонд. Ныртæккæ дзы фенæн ис Тауаситы Сослæнбеджы скульптурæтæ, Хохты Асланджерийы графикæ, æмæ равдыст «Мыггæгты коллекцитæ».
Ивгъуыд аз национ проект «Культурæ» æххæст кæнгæйæ, балæвæрдтой курдиат техникон фæрæзтæ балхæныны тыххæй. Уыцы хъуыддаг сæххæст кæнынæн дихгонд æрцæудзæн 4 милуаны æмæ 800 мин сомы. Хъуамæ сæвæрой мобилон хусгæнæнтæ, уымæлгæнæнтæ æмæ кондиционертæ. Нывыл температурон-уымæладон уаджы фæрцы фадат уыдзæн йæ агъуыстыты фенын бæстæйы сæйрагдæр музейты уацмыстæ.
