Фæсивæд лæвæрдтой фæрстытæ, æмæ истой бæстон дзуæппытæ
Уæрæсейы æхсæнад «Знание»-йы лектор йæ зонындзинæдтæ раргом кодта Æрыдоны 1-æгæм скъолайы ахуырдзаутæн. Стыр æргом здæхт æрцыд профориентацион куыстмæ. Фæсивæд дæр лæвæрдтой фæрстытæ, æмæ истой бæстон дзуæппытæ. Зæгъын хъæуы уый, æмæ лекцитæ стæй дæсныйадæвдисæг ахуыртæ цæуынц интеллектуалон конкурсы программæ æххæст кæнгæйæ.
Ирон æвзаг ахуыр кæныны методты тыххæй Æрыдоны 10-æм скъолайы ахуырдзаутæн радзырдта ЦИПУ-йы ирон филологийы факультеты магистратурæйы 1-æм курсы студенткæ Цхуырбаты Аланæ. Уæрæсейы æхсæнад «Знание»-йы лектор куыд фæнысан кодта, уымæ гæсгæ, хъазтыты, кафтыты æмæ зарджыты фæрцы æрыгæттæн æнцондæр у хъуыды бамбарын. Уый скъоладзаутæн радзырдта сæ фидæны дæсныйады тыххæй. Аланæйы хъуыдымæ гæсгæ, ахæм лекцитæ ахадгæ сты скъоладзаутæн – уыдоны руаджы базонынц уæлдæр ахуыргæнæндоны хицæнцинæдтæ.
Скъоладзаутæ лæвæрдтой фарстытæ. Уæлдай цымыдисдзинад сæм сæвзæрын кодтой бацæуæн фæлварæнтæ æмæ фидæны дæсныйады тыххæй хъусынгæнинæгтæ. Æппæты активон ахуырдзау Хъайтмазты Сосланæн радтой зæрдылдарæн лæвæрттæ Уæрæсейы æхсæнад «Знание»-йы номæй. Лæппуйы ныхæстæм гæсгæ, раджы равзæрста йæ фидæны дæсныйад, ацы лекци та нымайы тынг пайдайагыл.
Лекцитæ æмæ дæсныйадæвдисæг ахуыртæ арæзт цæуынц Уæрæсейы æхсæнад «Знание»- йы интеллектуалон конкурс «Поступай в СОГУ со знанием»-ы фæлгæты. Æрыдоны фыццæгæм скъолайы ацыд проект байгом кæныны кадджын мадзал. Конкурс скъоладзаутæн æххуыс у сæ профессионалон фæндаг равзарынæн, сæ индивидуалон миниуджытæ раргом кæнынæн æмæ дæсныйæдтимæ базонгæ уæвынæн. Ирон æвзаг æмæ литературæ, физикæ, хими, биологи æмæ георгафи. Конкурсы фæлгæты Æрыдоны 1-æм скъолайы цы мадзæлттæ скодтой, уыдон апарахат кæндзысты республикæйы иннæ ахуыргæнæндæттыл дæр.
Уæрæсейы æхсæнад «Знание» -имæ конкурс саразджытæ сты ЦИПУ æмæ республикæйы ахуырады æмæ наукæйы министрад. Лекцитæ æмæ дæсныйадæвдисæг ахуырты хæслæвæрдтæ чи скæна, уыцы лæппутæ æмæ чызджытæн ЦИПУ-мæ сæ гæххæттытæ дæтгæйæ сæ Иумæйаг паддзахадон эфæлварæны бæрæггæнæнтæм бафтаудзысты уæлæмхасæн 3-йæ 5 баллы онг. Проекты бацархайæн ис онлайн хуызы дæр. Уый тыххæй хъæуы курдиат бадæттын телеграмы хыз «Знание. Осетия»-мæ. Уый фадат ратдзæн лекцитæ æмæ дæсныйадæвдисæг ахуырты архайæг суæвынæн. Проект æххæстгонд цæуы дыууæ къæпхæнæй. Скъоладзаутæй ацы аз кæмæн нæ бантыса конкурсы бацархайын, уыдонмæ йæ саразджытæ æнхъæлмæ кæсдзысты ног аз
