Архайы дзы 100 педагогæй фылдæр республикæйы алы ахуыргæнæндæттæй
Цæгат Ирыстоны райдыдта профессионалон дæсныйады конкурс «Афæдзы ахуыргæнæджы» регионалон этап. Архайы дзы 100 педагогæй фылдæр республикæйы алы ахуыргæнæндæттæй. Жюри аргъ кæндзæн æрмæст фæлтæрдджын педагогтæн нæ, фæлæ ацы къабазы фыццаг къахдзæфтæ чи кæны, уыцы ахуыргæнджытæн дæр. Конкурс цæуы 11 номинацимæ гæсгæ. Сæ хыгъды – афæдзы ахуыргæнæг, афæдзы хъомылгæнæг, педагогон дебют æмæ æндæртæ. Конкурс цæудзæн цалдæр къæпхæнмæ гæсгæ. Скъолаты гом уроктæ – уый у сæйраг фæлварæн. Ахуырады æмæ наукæйы министр Алыбекты Эллæ куыд загъта, афтæмæй ацы конкурс – хуымæтæг ерыс нæу, фæлæ æрвылбон кæстæрты хъомыл кæнынмæ æмæ ахуыр кæнынмæ стыр æвæрæн чи хæссы, уыцы ахуыргæнджыты сбæрæг кæныны ахсджиаг мадзал.
