Йæ лекциты вæййы æцæг спектакльтæ
Цæгат Ирыстоны паддзахадон медицинон академийы ахуыргæнæг Фидараты Каринæ сси æппæтуæрæсеон конкурс «Прошлое для будущего: история в неисторических вузах»-ы призер. Йæ лекциты вæййы æцæг спектакльтæ. Ахуыры ахæм цымыдисаг хуызмæ се ргом раздæхтой конкурсы жюрийы уæнгтæ. Ныр Фидараты Каринæ лæвар фæбæрзонддæр кодта йæ квалификаци бæстæйы хуыздæр уæлдæр ахуыргæнæндæттæй иуы.
Фыдыбæстæйы Стыр хæсты цаутæ сценикон равдыстыты хуызы, сæйраг рольты та – студенттæ. Конспектты бæсты – документалон кинонывты равдыст æмæ театртæм балцытæ. Историйы ахуыргæнæг Фидараты Каринæйы хъуыдымæ гæсгæ, цавæрдæр дуджы мидис банкъарæнынæн æрмæст ахуыргæнæн чиныг кæсын фаг нæу. Ахæм цымыдисаг приемттæ студентты разæнгард кæнынц ахуыр кæнынмæ. Ацы ногдзинæдтæ æвæрд æрцыдысты ахуыргæнæджы конкурсон наукон куысты бындуры.
Æппæтуæрæсеон конкурс «Прошлое для будущего: история в неисторических вузах»-ы призер суæвын Фидараты Каринæйæн у йæ профессионалон æнтыстдзинæдтæ æвдисæн. Ерысы архайдта 100 ахуыргæнæгæй фылдæр. Конкурс цыд 3 къæпхæнæй. Архайджытæ экспертон советы размæ рахастой, медицинон ахуыргæнæндæтты студентты Уæрæсейы истори ахуыр кæнынмæ разæнгард кæнынæн, цы авторон методикæтæй пайда кæнынц, уыдон.
Фидараты Каринæйы ныхæстæм гæсгæ, истори у ирд, драмон æмæ разæнгардгæнæн предмет. Сæйрагдæр у, раргом кæнын æй базонын. Ацы конкурсон фæлтæрддзинад ахуыргæнæгæн фыццаг нæу.
Алы лекци дæр, цыма бæстæйы историмæ балц у, уый хуызæн, зæгъынц студенттæ. Ахуырадон процессы ногдзинæдтæ сæ зæрдæмæ цæуынц. Конкурсы архайд Фидараты Каринæйæ æрмæст фæлтæрддзинад нæ радта. Фæзынд ын гæнæн йæ квалификаци лæвар фæбæрзонддæр кæнын бæстæйы хуыздæр ахуыргæнæндæттæй иуы – Мæскуыйы æппæтадæмон ахастдзинæдты паддзахадон институты.
