Мадзал бацæттæ кодтой Цæгат Ирыстоны паддзахадон университеты ирон филологийы факультеты студенттæ
Хуымæтæг экскурсийы бæсты цымыдисаг хъазт. Скъоладзаутæ национ музейы архайдтой интерактивон квест «Нæртон балц»-ы. Рæзгæ фæлтæр базонгæ сты ирон адæмы эпосимæ æмæ традицитимæ. Мадзал бацæттæ кодтой Цæгат Ирыстоны паддзахадон университеты ирон филологийы факультеты студенттæ. Баххуыс сын кодтой ахуыргæнджытæ æмæ музейы кусджытæ. Бæстондæр радзурдзæн Хъайтмазты Дзерассæ.
Афтæ райдыдта национ музеймæ «Нæртон балц». Уый хуымæтæг экскурси нæу, фæлæ цымыдисаг квест. Скъоладзаутæн хъазт бацæттæ кодтой Цæгат Ирыстоны паддзахадон университеты ирон филологийы факультеты 2-æм курсы студенттæ национ музейы кусджытимæ иумæ.
2 командæйы – «Сослан» æмæ «Сатана»-йы – хыгъдмæ бацыдысты Дзæуджыхъæуы 7-æм æмæ 46-æм скъолаты минæвæрттæ. Алкæцыйыдæр – фæйнæ 5 адæймаджы – 8-æм-9-æм кълæсты ахуырдзаутæ. Нарты кадджытæ сын зонгæ сты скъолайы программæйæ. Командæтæ агуырдтой, эпосимæ баст экспонаттæ, уыдон та экспозицийы чысыл не сты.
Æрмæст ирон адæмы культурон хæзнатимæ базонгæ уæвын нæ, фæлæ ма мадæлон æвзагыл дæр æмхиц кæнын. Мадзал арæзт уыд ирон æвзагыл. Квестæй фæстæмæ ма, скъоладзаутæ хъазыдысты рагон ирон хъæзтытæй, æмбырд кодтой пазлтæ, æхстой æрдынæй.
Хъазты хатдзæгтæм гæсгæ фæуæлахиз хæлардзинад. Архайджытæ райстой зæрдылдарæн лæвæрттæ, сæйрагдæр та – цины æнкъарæнтæ æмæ хи культурæ арфдæр бамбарыны фадат.
